शासकभन्दा पनि जनताको सेवकको रूपमा काम गरिरहेका छौंः मेयर बस्नेत

काठमाडौं, ११ चैत । काठमाडौंको दक्षिणकाली नगरपालिका प्रमुख मोहन बस्नेतले देशको अर्थतन्त्रलाई टेवा पुग्नेगरी काठमाडौं–हेटौंडा राजमार्ग आफ्नो कार्यकालमा सुचारु भएको बताएका छन् । आज (सोमबार) रिपोर्टर्स क्लब नेपालले आयोजना गरेको ‘स्थानीय तहको विकासको मोडल, जनउत्तरदायित्व र जनप्रतिनिधिहरुको भूमिका’ विषयक अन्तरक्रिया कार्यक्रमलाई सम्बोधन गर्दै उनले २०४९ सालमा कल्पना गरेको बाटोले आफ्नो कार्यकालमा पूर्णता पाएको बताएका हुन् ।

‘दक्षिणकाली नगरपालिका एउटा यस्तो नगरपालिका हो, २०४९ सालमा कल्पना गरेको बाटोले आज यो देशको अर्थतन्त्रलाई ठूलो मद्धत पुग्नेगरी काठमाडौं–हेटौंडा राजमार्ग खोल्नका लागि हामी सफल भएका छौं । अहिले हामी हैटौंडाको लगभग २ सय किलोमिटरको बाटोलाई छोट्याउनका लागि ७६ किलोमिटर बाटो अहिले हामीले काठमाडौं–दक्षिणकाली मोटरबाटो सुचारु गरिराखेका छौं,’– उनले भने ।
नगरपालिकाले धार्मिक एवं पर्यटकीय हिसाबले पनि सम्भावना बोकेको उनले बताए । नगरपालिका क्षेत्रभित्र रहेको विभिन्न धार्मिक तथा पर्यटकीय स्थलमा आन्तरिक तथा बाह्य पर्यटकहरु आउने गरेको उनले बताए । पर्यटक तथा तीर्थयात्रीहरुलाई विशेष महत्वव दिएर नगरपालिकाले काम गरिरहेको मेयर बस्नेतको भनाइ छ ।

‘दक्षिणकाली नगरपालिका धार्मिक पर्यटकीय श्रेत्र भएको हुनाले लाखौं भक्तजनहरु दक्षिणकाली माताको दर्शन गर्न आउनुहुन्छ । उहाँहरुलाई कतै समस्या नहोस् भनेर हामीले विभिन्न निकायसम्म समन्वय गरेर हामीले व्यवस्थित रुपमा काम गर्न सकेका छौं,’– उनले भने ।

साथै, धर्म र संस्कृति बचाउनका लागि धर्मसंस्कृति कोषको व्यवस्था गरी बजेट विनियोजन गरी हरेक धर्म, संस्कृति, पर्व, जात्रा बचाउने काम भइरहेको पनि मेयर बस्नेतले बताए । शिक्षाको क्षेत्रमा पनि सरकारी तथा निजी विद्यालयको सञ्चालन भइरहेको र एसईई परीक्षामा पनि राम्रो नतिजा रहेको उनले बताए ।

मेयर बस्नेतले दक्षिणकाली पर्यटकीय क्षेत्र पनि रहेको र त्यहाँ आउने आन्तरिक र बाह्य पर्यटकहरुलाई व्यवस्थित गर्ने कामहरु पनि नगरपालिकाले गरिरहेको बताए । अहिले प्राइभेट क्षेत्रसँग मिलेर केबलकारको काम भइरहेको पनि उनले सुनाए । मेयर बस्नेतले नगरपालिकाले ४० प्रतिशत भूमि कृषि क्षेत्रलाई छुट्याउन सफल भएको पनि बताए । कृषि उपजहरु उत्पादन हुने प्रमुख थलोको रुपमा नगरपालिका विकसित हुँदै गएको, कृषकहरुलाई प्रोत्साहन गर्न गाईँ, भैंसी र कुखुराको चल्ला वितरण गर्ने काम भइरहेको उनले बताए ।

आफूहरुले शासकभन्दा पनि जनताको सेवकको रुपमा काम गरिरहेको उनले बताए । देश संघीय लोकतान्त्रिक गणतन्त्रात्मक व्यवस्थामा प्रवेश गरेपछि स्थानीय तहले गर्ने सकारात्मक कर्मले नै मुलुकको राजनीतिक धरोहरलाई ठूलो टेवा पुर्याइरहेको उनले बताए । ‘हामी जनताको सेवक हौं, हामी शासक होइनौं भन्ने परिस्थिति निर्माण गरेर सेवा दिइरहेको कुरा म जानकारी गराउन चाहन्छु,’– उनले भने ।
हरेक पालिकाले गरेको राम्रो अभ्यासको कारणले तीनै तहको सरकारले त्यसको श्रेय प्राप्त गरिहरहेको उनले बताए । दक्षिणकालीको डाँडाबाट थुप्रै हिमालहरुको दृश्यावलोकन गर्न सकिने पनि उनले बताए ।