अकबरे खुर्सानीको हब बन्दै रिब्दीकोट, किसानहरूले वार्षिक ३ लाखसम्म कमाउन सक्ने वातावरण बनेको मेयर कार्कीको दाबी

काठमाडौं, ११ चैत । पाल्पाको रिब्दीकोट गाउँपालिका अध्यक्ष नारायण कार्कीले आफ्नो पालिकाका नागरिकहरुको आम्दानी र जीवनयापनको मुख्य स्रोत कृषि रहेको बताएका छन् । आज (सोमबार) रिपोर्टर्स क्लब नेपालले आयोजना गरेको ‘स्थानीय तहको विकासको मोडल, जनउत्तरदायित्व र जनप्रतिनिधिहरुको भूमिका’ विषयक अन्तरक्रिया कार्यक्रमलाई सम्बोधन गर्दै उनले नगरभित्रका नागरिकहरुले दैनिक ८ घण्टा कृषीमा श्रम गरेवापत महिनामा २५ हजार र वर्षमा ३ लाख रुपैयाँ कमाउन सक्ने वातावरण बनिरहेको बताए ।

‘त्यहाँका सबै नागरिकहरुको आम्दानी र जीवनयापनहरुको मुख्य पेशा कृषि नै हो । गाउँपालिकाले कृषिलाई नै पहिलो प्राथामिकता दिएर काम गरिरहेको छ । कुनै नागरिकले प्रत्येक दिन ८ घण्टा काम गर्दछ भने उसले महिनामा २५ हजार रुपैयाँ कमाउने र वर्षमा ३ लाख रुपैयाँ कमाउने वातारण निर्माण भइरहेको छ,’– उनले भने ।

कृषि क्षेत्रलाई प्रवरद्र्धन गर्नका लागि पालिकाभित्रको बाँझो जग्गामा काम गर्न चाहने, बाख्रा पालन गर्न चाहने, खेती गर्न चाहने कृषकहरुलाई अनुदानको प्याकेज पनि पालिकाले अगाडि बढाएको उनले बताए ।

साथै, रिब्दीकोट गाउँपालिकामा दक्षिण एसियाकै सबैभन्दा अग्लो त्रिशुल रहेको भैरवस्थान मन्दिर रहेको पनि उनले बताए । मेयर कार्कीका अनुसार नेपालमा सेन वंशहरुले शासनको सुरुवात गरेको ठाउँ पनि यसै नगरपालिका अन्तर्गत पर्छ ।

मेयर कार्कीले रिब्दीकोट गाउँपालिका अकबरे खुर्सानीको हबको रुपमा अगाडि बढिरहेको बताए । उनले यो वर्षमात्रै पौने ८ करोड बराबरको अकबरे खुर्सानी निर्यात गर्न गरिएको पनि जानकारी गराए ।

रिब्दीकोटबाट अघिल्लो वर्ष २३ करोड ६० लाख बराबरको कृषि र पशुजन्य उत्पादनहरु निर्यात गर्न सकेकोमा यस वर्ष ३१ करोड ४ लाख बराबरको कृषि र पशुजन्य उत्पादनहरु निर्यात गर्न सफल भएको उनले बताए । गाउँपालिका, मासु, टमोटर, सुन्तलालगायतका कृषिको क्षेत्रमा आत्मनिर्भर रहेको मेयर कार्कीले सुनाए ।

त्यहाँका स्थानीयहरुले अहिले पैसा चाहिएको अवस्थामा आफ्नो बारीमा उत्पादन भएको कृषि सामाग्री बेचेर जोहो गर्न सकिने अवस्था रहेको उनले बताए । मेयर कार्कीले पर्यटनलाई पनि आफूहरुले उत्तिकै महत्व दिएर काम गरिरहेको बताए । उनले पहिलो ध्यान कृषिमै रहेको र दोस्रो प्राथामिकता कृषिमा दिइएको मेयर कार्कीले बताए ।

त्यसैगरी, छिमेकी पालिकाबाट आफ्नो पालिकामा कृषि पर्यटनको रुपमा भ्रमाणको रुपमा आउन थालेको पनि उनले सुनाए । पालिकाले यातायातलाई पनि उत्तिकै महत्व दिएर काम गरिरहेको उनले बताए । पालिकाका सबै ठाउँमा हिउँद वर्षामा आउन जान सकिने उनले सुनाए । मेयर कार्कीले पूर्वाधारको क्षेत्रमा पनि निकै महत्वपूर्ण काम भइरहेको बताए ।