काठमाडौं, ११ चैत । कैलालीको टीकापुर नगरापालिका प्रमुख रामलाल डगौरा थारूले टीकापुरलाई गुलाफको सहरको परिकल्पना गर्दै सिङ्गार्ने तयारी भइरहेको बताएका छन् । आज (सोमबार) रिपोर्टर्स क्लब नेपालले आयोजना गरेको ‘स्थानीय तहको विकासको मोडल, जनउत्तरदायित्व र जनप्रतिनिधिहरुको भूमिका’ विषयक अन्तरक्रिया कार्यक्रमलाई सम्बोधन गर्दै उनले स्वर्गीय खडकबहादुर सिंहको परिकल्पनाअनुसार काम भइरहेको बताएका हुन् ।
‘टीकापुर नगरपालिका स्वर्गीय खडकबहादुर सिंहको परिकल्पना भएको कारणले गर्दा त्यसलाई अब डेन्टिङपेन्टिङ गरिनुपर्छ भन्ने उद्देश्यको साथ गुलावको सहरको परिकल्पना गर्दैै फूलबुट्टाले सिगार्ने प्रक्रियामा हामी अगाडि बढेका छौं,’– उनले भने, ‘आध्यात्मिक रुपमा पनि हामीले महाकुम्भ मेला लगाउने भन्ने उद्देश्यकको साथ अगाडि बढिरहेका छौं ।’
साथै, उनले बन्द अवस्थामा रहेको टीकापुर विमानस्थल पनि अहिले सञ्चालनमा ल्याइएको बताए । मेयर थारूले टीकापुरलाई अध्यात्मसँग जोड्न महाकुम्भ मेलाको तयारी गरेको पनि बताए ।
त्यस्तै, शैक्षिक जगतमा पनि टीकापुरलाई स्थापित गराउने, खेलकुदलाई पनि प्रभावकारी ढंगबाट अगाडि बढाइरहेको उनले बताए । टीकापुरलाई शैक्षिक हबको रुपमा अगाडि बढाउन सुदूरपश्चिम प्रदेश सरकारले पनि समन्वय गरिरहेको उनले बताए ।
कर्णाली नदीमा ¥याफ्टिङको व्यवस्था गर्ने तयारी रहेको पनि उनले बताए । टीकापुरलाई समृद्ध बनाउने, सद्भाव कायम गर्ने, दुर्गम क्षेत्र र सहरी क्षेत्रलाई जोड्नेलगायतका काम भइरहेको उनले बताए ।
मेयर थारूले पछिल्लो समय टीकापुर शान्त र सुशासनसहित अगाडि बढिरहेको बताए । स्रोत र साधननले भ्याउनेसम्म आफूहरुले काम गरिरहेको पनि मेयर थारूले बताए ।
‘पछिल्लो समय टीकापुर शान्त र सुशासनसहित अगाडि बढिरहेको छ । टीकापुर क्लिन, सुन्दर र व्यवस्थित सहरको रुपमा हामी पाउने गर्दछौं । हाम्रो साधन, स्रोतले भ्याउने गरी हामी आफ्ना कार्यहरु गरिराखेका छौं,’– उनले भने, ‘टीकापुर सम्भावना बोकेको क्षेत्र हो । हामीसँग सबैभन्दा लामो नदी छ, तटीय क्षेत्रले गर्दा त्यहाका किसान दाजुभाइहरुले वर्षेनी दुःख भोग्नुपरेको अवस्था पनि छ ।’
प्रतिक्रिया