नीलकण्ठ नगरपालिकामामा कक्षा १२ सम्मको शिक्षा निःशुल्क, उद्यमशीलताको लागि १५ लाख ऋण सहयोग

काठमाडौं, ११ चैत । धादिङको नीलकण्ठ नगरपालिका प्रमुख भीमप्रसाद ढुङ्गानाले आफ्नो कार्यकालमा नगरभित्र १९५ किलोमिटर रिङ्ग रोड बनाएको बताएको दाबी गरेका छन् । आज (सोमबार) रिपोर्टर्स क्लब नेपालले आयोजना गरेको ‘स्थानीय तहको विकासको मोडल, जनउत्तरदायित्व र जनप्रतिनिधिहरुको भूमिका’ विषयक अन्तरक्रिया कार्यक्रमलाई सम्बोधन गर्दै उनले आफ्नो कार्यकालमा भौतिक विकासदेखि शिक्षा, स्वास्थ्य र कृषिमा पनि व्यापक काम भइरहेको बताएका हुन् ।

‘हाम्रो कार्यकालमा हामीले १९५ किलोमिटर रिङ्ग रोड बनाएका छौं । शिक्षा कक्षा १२ वर्ष निःशुल्क छ । मासिक शुल्क, रजिष्ट्रेसन शुल्क र परीक्षाको कपीको समेत विद्यार्थीहरुले तिर्नुपर्दैन,’– उनले भने ।
मेयर ढुङ्गानाले आफ्नो नगरलाई संघीय मामिला तथा सामान्य प्रशासन मन्त्रालयले ‘देशकै उत्कृष्ट नगरपालिका’ घोषणा गरेको पनि स्मरण गराए ।

त्यस्तै, नागरिकहरुको घर–घरमा पुगेर रोगहरु स्कृनिङ गर्ने र ९८ प्रकारका औषधीहरु निःशुल्क वितरण गनेृ जस्ता काम पनि भइरहेको उनले बताए । मेयर ढुङ्गानाले रोगहरु स्कृनिङ गरेपछि न्युनतम् सल्लाह सुझाव दिने कामसमेत भइरहेको बताए । ‘संविधानतः स्वास्थ्य, शिक्षा, खानेपानी भनेको छ, हामीले करिब–करिब ८५ प्रतिशतभन्दा बढीलाई खानेपानी पुर्याइसकेको अवस्था छ,’– उनले भने ।

युवायुवतीहरु विदेश गइरहेका अवस्थालाई मध्यनजर गरेर मेयर उद्यमशील कार्यक्रम लागू गरिएको पनि उनले बताए । एक हप्ताको ट्रेनिङ लिइसकेपछि ग्लोबल आइएमई बैंकसित समन्वय गरेर उद्यमका लागि १५ लाख रुपैयाँ सहयोग दिने गरिएको उनले बताए । उक्त रकम पूरै उद्यमशीलतामा खर्च गरिनुपर्ने र महिलाहरुको लागि ६ प्रतिशत र पुरुषहरुको लागि ५ प्रतिशत ब्याज ४ वर्षसम्म नगरपालिकाले नै तिरिदिने व्यवस्था गरिएको उनले बताए ।

साथै, निलकण्ठ एकेडेमी बनाएर कला र साहित्यको संरक्षण र विकासमा पनि काम गरिरहेको उनले बताए ।