पूर्वराजा ज्ञानेन्द्र र दुर्गा प्रसाईँलाई कडाभन्दा कडा कारवाही गर्न माओवादी केन्द्रको माग

काठमाडौं, १६ चैत । नेकपा (माओवादी केन्द्र) ले तीनकुनेमा भएको राजवादी समूहको हिंसात्मक आन्दोलन पूर्वराजा ज्ञानेन्द्र शाहको योजनामा भएको दाबी गरेको छ । आज (शनिबार) विज्ञप्तिमार्फत माओवादी केन्द्रले सो घटनाका योजनाकार (ज्ञानेन्द्र) र प्रदर्शनको आयोजना गर्ने दुर्गा प्रसाईँलाई कडाभन्दा कडा कारबाहीको माग गरेको छ ।

‘यस्ता हिंसात्मक एवं आपराधिक कार्य गर्न÷गराउन उक्साउने योजनाकार तथा प्रदर्शनका आयोजकलाई सम्पूर्ण घटनाप्रति जवाफदेही बनाउन र अझ गम्भीर अनुसन्धान गरी दोषीलाई कडाभन्दा कडा कारवाही गर्न सरकारसँग जोडदार माग गर्दछौं,’– माअ‍ोवादी केन्द्रले भनेको छ ।

माओवादी केन्द्रले उक्त प्रदर्शनलाई ‘विध्वंशको पराकाष्ट’ को संज्ञा दिएको छ । माओवादीले प्रदर्शनमा पत्रकार सुरेश रजक र सविन महर्जनको मृत्यु, निजी तथा सार्वजनिक सम्पत्तिको तोडफोड, सञ्चार गृह र औषधि कारखानामा आगो लगाउने, डिपार्टमेन्ट स्टोरभित्र पसेर सामानहरु लुट्ने जस्ता डकैतीजन्य, अमानवीय र अराजक कार्यको घोर भ्रत्सना एवं निन्दा गरेको छ ।