पौडी खेल्ने क्रममा डुबेर दुई जनाको मृत्यु

अर्घाखाँची, चैत १७ । अर्घाखाँचीमा पौडी खेल्ने क्रममा डुबेर दुई जनाको मृत्यु भएको छ । मृत्यु हुनेमा भुमिकास्थान नगरपालिका १० धनचौरको देउराली नेटाका १९ वर्षीय दिलिप नेपाली र १७ वर्षीय अशोक नेपाली रहेको जिल्ला प्रहरी कार्यालय अर्घाखाँचीले जनाएको छ ।

भुमिकास्थान नगरपालिकाको वडा नम्बर १० मै पर्ने झिमरुक खोलामा शनिबार पौडी खेल्न गएका ६ जनामध्ये दुई जनाको मृत्यु भएको हो । आफन्त र धनचौर प्रहरीको खोज तलासपछि मृतक दुवै जनाको शव पोष्टमार्टमका लागि अर्घाखाँची अस्पतालमा राखिएको छ । घटनाबारे प्रहरीले अनुसन्धान अघि बढाएको छ ।