अधिवक्ता स्वागत नेपाललाई गैरकानुनी रूपमा पक्राउ गरिएको दाबीसहित सर्वोच्चमा बन्दीप्रत्यक्षीकरण

काठमाडौं, १७ चैत । अधिवक्ता स्वागत नेपाललाई गैरकानुनी रुपमा पक्राउ गरिएको दाबीसहित सर्वोच्च अदालतमा बन्दीप्रत्यक्षीकरणको निवेदन परेको छ । गत शुक्रबार राति प्रहरीले अधिवक्ता नेपाललाई उनको ल फर्मबाट पक्राउ गरेको थियो । अधिवक्ता नेपालकी छोरी सभ्यता नेपालले सर्वोच्चमा बन्दीप्रत्यक्षीकरणको रिट निवेदन दायर भएको बताईन् ।

‘उहाँलाई गैरकानुनी रुपमा ल फर्ममा काम गरिरहेको अवस्थामा गैरकानुनी रुपमा पक्राउ गरिएको छ । अहिले सर्वोच्चमा रिट निवेदन दायर गरेका छौं । दर्ताको प्रक्रियामा छ,’– रिपोर्टर्स नेपालसँगको संक्षिप्त कुराकानीमा उनले भनिन् ।

अधिवक्ता नेपाल राजसंस्था पुनर्स्थापनाका लागि गठन भएको संयुक्त जनआन्दोलन परिचालन समितिका प्रवक्ता थिए । गत शुक्रबार राजसंस्था पुनर्स्थापना समितिले गरेको प्रदर्शन हिंसात्मक बनेपछि प्रवक्ता रहेका नेपाललाई पक्राउ गरिएको थियो ।

‘मेरो बुवा–आमा दुवैजना ल फर्ममा काम गरिरहेको अवस्थामा कानुन व्यवसायीको कार्यकक्षबाट मेरो बुवा अधिवक्तासमेतलाई पक्राउ गर्नु निन्दनीय कार्य हो । कार्यकक्षबाट राजनीतिक आस्था, विचार वा निष्ठा राखेको कारणबाट नागरिक र कानुन व्यवसायी उपर राज्यले प्रतिशोधपूर्ण व्यवहार गर्न नहुने नजीर ( नि.नं.१०२८१) सिद्धान्त समेत विपरित धरपकड गर्नु कानुन र मानव अधिकारको ठाडो उलंघन हो । पक्राउ पूर्जीसमेत नदिई एउटा कानुन व्यवसायीलाई आफ्नो कार्यकक्षमा मूल ढोकामा ताल्चा लगाएको अवस्थामा अनधीकृत रुपमा पर्खाल नाघेर प्रवेश गरी राजतन्त्रप्रति आस्था राखेको भरमा आस्थाको बन्दी (prisoner of conscience) बनाइएका मेरो बुवा अधिवक्ता स्वागत नेपाल समेतलाई यथाशिघ्र रिहाइको माग गर्दछु,’– रिट निवेदनमा भनिएको छ ।