अब ज्ञानेन्द्र शाहजस्तो व्यक्तिले सपना देख्नेमात्रै हो, राजा बन्न पाउँदैनन्ः महन्थ ठाकुर

काठमाडौं, १७ चैत । लोकतान्त्रिक समाजवादी पार्टी (लोसपा) का अध्यक्ष महन्थ ठाकुरले अब ज्ञानेन्द्र शाहजस्तो व्यक्ति कहिले पनि राजा नबन्ने बताएका छन् । आज (आइतबार) रिपोर्टर्स क्लब नेपालको २७औं वार्षिकोत्सव समारोहलाई सम्बोधन गर्दै उनले अब नेपालमा कोही व्यक्तिले राजा बन्ने आकांक्षा राख्छ भने त्यो सपनामात्रै हुने बताएका हुन् । उनले जनताले पाएको अधिकार कसैले पनि राजालाई जिम्मा नलगाउने बताए ।

‘ृउहाँलाई राजा नै बन्न मन छ भने जनताबाट आउनुपर्यो, चुनावबाट, पार्टीबाट आउनुपर्यो । अब राजतन्त्र आउने सपना देख्छन् भने, सपनामा देखेको कुरा ठीकै लाग्छ जोगेपछि सत्य हुँदेन । अहिले पनि ज्ञानेन्द्र शाहले सपना देखिराखेको छन् । राजा बन्ने उनको सपना छ, अब सपना देखे हुन्छ, ठीक छ । तर, जनताले पाएको अधिकार अरुलाई दिँदैनन् । अब कसैले ज्ञानेन्द्र शाहजस्तो व्यक्तिले राजा हुन पाउँदैनन्,’– उनले भने ।

इतिहासमा राजतन्त्र मारकाट, हत्या, हिंसा, षड्यन्त्रबाट स्थापना भएको र पृथ्वीनारायण शाहले पनि सोही प्रक्रियाबाट भूगोलको स्थापना गरेको उनले बताए । पृथ्वीनारायण शाहको बडा–बडा नाम सुनिएपनि उनले ज्यादती गरेको, जनताको नाक, कान काट्न लगाएको जस्ता भयानक र डरलाग्दा इतिहास पढ्न पाइने नेता ठाकुरले बताए ।