हामीले लडेर ल्याएको व्यवस्थामाथि गम्भीर प्रश्नहरु उत्पन्न भएका छन्, आत्मसमिक्षा गर्नुपर्छ : कर्ण थापा

काठमाडौं, १७ चैत्र । नेकपा (एमाले) का प्रभावशाली नेता तथा पूर्वमन्त्री कर्णबहादुर थापाले हावादारी गफ गरेर देश नबन्ने टिप्पणी गरेका छन् । उनले लडेर र रोजेर ल्याएको व्यवस्थामाथि प्रश्नहरु उत्पन्न हुनुमा देशलाई भन्दापनि आफूलाई केन्द्रभागमा राखेर प्रचार गरिनु कारण भएको हुनसक्ने भन्दै समिक्षा गरिनुपर्ने बताए ।

आज (आइतबार) रिपोर्टर्स क्लब नेपालको २७औं वार्षिकोत्सव समारोहलाई सम्बोधन गर्दै उनले यस्तो बताएका हुन् । उनले भने,‘सही कामबाट आफ्ना अभिभारा पूरा गरेर स्थापित हुनुपर्ने आवश्यकत्ता देशको छ । काम त गर्ने तर राष्ट्रलाई केन्द्रभागमा राखेर गरिनुपर्छ, प्रचारमा बढि आउनकोलागि सक्रिय बन्ने प्रवृत्ति देखापरेको छ । हामीले लडेर र रोजेर ल्याएको व्यवस्थामाथि गम्भीर प्रश्नहरु उत्पन्न हुनुमा यो पनि एउटा मूल कारण हो भन्ने मलाई लाग्छ । आत्मसमिक्षा गर्नुपर्छ । गणेशमानजीजस्तो मान्छे जीवनको अन्तिम कालमा पार्टी त्याग्न किन पुग्नुभयो, किसुनजी किन पुग्नुभयो ? बाबुरामका कन्भिक्सन जे थिए, आज छन् त ? समिक्षा गर्नुपर्छ ।’

उनले हावादारी ढंगले बोलेर देश र समाज बन्न नसक्ने टिप्पणी गरे । उनले भने,‘व्यक्ति बन्न सक्छन् । बालेनदेनि रवि आउन सक्छन् । हामी गम्भीर भएर सोचौं । सही कुरा सम्प्रेषण गरौं । काम भनेको ठूलो शक्ति र इमान भनेको ठूलो ज्ञान हो । ऋषि धमलाले सक्रियताले निर्माण गरेको व्यक्तित्व हो ।’