नेपालको सञ्चारक्षेत्र राजावादीहरुको आक्रमणको शिकार भयो : ऋषि धमला

काठमाडौं, १७ चैत्र । रिपोर्टर्स क्लब नेपालका सभापति ऋषि धमलाले नेपालको सञ्चारक्षेत्र अहिले राजावादीहरुको आक्रामणको शिकार भएको टिप्पणी गरेका छन् । आज रिपोर्टर्स क्लब नेपालको २७औं वार्षिकोत्सव समारोहलाई सम्बोधन गर्दै उनले यस्तो बताएका हुन् ।

उनले भने,‘नेपालको सञ्चार क्षेत्रलाई जहिल्यैपनि राजावादीहरुले घाँटी निमोठ्ने काम गरे । २०६१ सालदेखि हेर्दै जानुहोस, सञ्चार क्षेत्रलाई कमजोर बनाउने, अहिलेको आन्दोलनको चौतर्फी आलोचना भएको छ । सञ्चार क्षेत्रमाथि प्रहार भयो । हामी त्यो प्रहार स्विकार गर्दैनौं । हामी सुशासन र विकासको पक्षमा छौं ।’

धमलाले नेपालमा लोकतन्त्रको विकल्प लोकतन्त्र र गणतन्त्रको विकल्प पनि गणतन्त्र नै भएको बताए । गणतन्त्रको विकल्प राजसंस्था हुनै नसक्ने उनको भनाई छ । उनले रजकको हत्या राजावादीहरुले नै गरेको दाबी गरे । उनले राजावादीहरुको शुक्रबारको आन्दोलन पूर्वराजा ज्ञानेन्द्र शाहको निर्देशनमा भएको बताए । उनले भने,‘मलाई भन्न डर छैन, त्यो आन्दोलनमा मारिएका पत्रकार सुरेश रजकको नाममा क्लबले पुरस्कार राशि घोषणा गरेको छ । यो पुरस्कार म प्रत्येक वर्ष क्यामेरामानलाई नै दिनेछु ।’

उनले तिनकुनेमा राजावादीहरुको प्रदर्शनको क्रममा पत्रकार सुरेश रजकको निधन भएकोले क्लबले यसवर्ष पुरस्कार नदिने निर्णय लिएको पनि जानकारी दिए ।