राजाको शासन कस्तो हुन्छ भनेर भर्खरै राजावादीहरुले तिनकुनेमा चरित्र देखाए, गणतन्त्रको विकल्प छैन : गृहमन्त्री लेखक

काठमाडौं, १७ चैत्र । गृहमन्त्री रमेश लेखकले लोकतन्त्र र गणतन्त्रको विकल्प निरंकुशतन्त्र हुन नसक्ने बताएका छन् ।उनले अहिले भएको व्यवस्थालाई नै सुधार गरेर जानुपर्नेमा जोड दिए । रिपोर्टर्स क्लब नेपालको २७औं वार्षिकोत्सव समारोहलाई सम्बोधन गर्दै उनले राजाको निरंकुश शासनको बारेमा थाहा नभएकाहरु भ्रममा बस्न नहुने भन्दै राजाहरुलाई प्रश्न गर्न नपाईने इतिहास स्मरण गराए ।

उनले भने,‘राजतन्त्रको शासन नदेखेको मान्छे पनि यहाँ हुनुहुन्छ, १८ वर्षअघि राजाको शासन थियो । अहिले २७, २८ वर्षका युवाहरुलाई राजसंस्थाबारे केही थाहा नहुन सक्छ, राजाको शासनमा आलोचना गर्न पाईन्छ कि पाईँदैन भनेर सोध्नुहोस ? मैले बुझेको राजतन्त्रमा राजालाई प्रश्न गर्न पाईँदैन् । प्रश्न गर्ने कोशिस गर्यो भने जेल जानुपर्छ । जति यो देशमा राजाको शासन रह्यो, कुनैपनि नागरिकले राजालाई प्रश्न गर्न सकेनन् । आज प्रधानमन्त्रीदेखि राष्ट्रपतिसम्मलाई प्रश्न गर्दैछौं । राष्ट्रपतलिाई आलोचना गरिरहेका छौं ।’

उनले राजाले गल्ती गर्यो भने कानूनी कारबाही हुँदैन थियो भनेर प्रश्न गरे । उनले भने,‘राजाले गल्ती गर्यो भने राजामाथि कानूनी कारबाही हुन्छ ? लोकतन्त्रमा त गल्ती गर्दा सबैमाथि कारबाही हुन्छ । हामीले फेरि त्यही व्यवस्था चाहेको हो ? लोकतन्त्र र गणतन्त्रमा अन्तर छ । राजाको शासन कस्तो हुन्छ भनेर भर्खरै तिनकुनेमा चरित्र देखाए । घरभित्र भएको मान्छेलाई आगो लगाईएको छ । राजाको शासन ल्याउँछु भनेका राजावादीहरुले पत्रकारलाई जलाएर ज्यान लिए ।’

सो क्रममा उनले सञ्चार क्षेत्रको सुरक्षाको प्रत्याभूति गराए । उनले भने,‘लोकतन्त्रको विकल्प लोकतन्त्र नै हो । गल्ती र कमजमोरी भएको छ भने सुधारेर जाने हो । नागरिकले प्रश्न गर्ने हो । सुधार गर्ने हो । कुनै लोकतन्त्रको विरुद्ध निरंकुशता हुन सक्दैन् । राष्ट्रप्रति र नागरिकप्रति हामीलाई जिम्मेवारीबोध भएको छ । सुधारेर जानेमा प्रतिबद्ध छौं । हुकुम नै कानून हुने राजतन्त्रको पद्धती उचित होला भनेर कर्णधार युवा पुस्ताले भ्रममा पर्नुहुँदैन । यही व्यवस्थालाई सुधारेर जानुपर्छ ।’

सो क्रममा उनले क्लबका सभापति ऋषि धमलाको सक्रियताको खुलेर प्रशंसा गरे । उनले भने,‘ऋषिजी आँफैमा अदभूत मानिस हुनुहुन्छ । विहान ६ बजे रेडियोमा बोल्नुहुन्छ । ६ बजे रेडियोमा बोल्नुअघि एक घण्टा अध्ययन गर्नुपर्ने होला, त्यसको लागि ५ बजेदेखि समय छु्ट्याउनुपर्ला, ५ बजे तयार हुन ४ बजे उठ्नुपर्ला, उहाँ निकै व्यस्त हुनुुहुन्छ । राति ११ बजेसम्म टिभीमै देखिनुहुन्छ । ऋषिजीबाट मेहनत सिक्नुपर्छ । अत्यन्तै मेहनती मान्छे हो । त्यही भएर प्रगति भयो । क्लबले संसद्को भूमिका निर्वाह गरेको छ । संसद नहुँदा क्लब साझा थलो बनेको छ । मैले पनि पटक पटक बोलेको छु । संसद् नभएको बेलामा संसद बनाउनु भयो, क्लबले लोकतन्त्रको लागि महत्वपूर्ण काम गरेको छ । नागरिकलाई सूचनाको हक हुन्छ । नागरिकको सूचनाको हक सञ्चार माध्यमले दिन्छ । क्लबले यो २७ वर्षमा बहुत राम्रोसँग सम्पादन गरेको छ । राष्ट्र र नागरिकको लागि गरेको यो सेवा प्रशंसनीय छ । बधाई छ । धन्यवाद छ । निरन्रतता दिनुहोला ।’