समाप्त भएको राजतन्त्रलाई व्युँताउन खोज्नु घाटबाट मुर्दालाई व्युँताउने कोशिसजस्तै होः अर्थमन्त्री पौडेल

काठमाडौं, १७ चैत । उपप्रधान एवं अर्थमन्त्री विष्णु पौडेलले नेपालमा राजतन्त्र फर्काउन खोज्नु समशान घाटबाट मुर्दा व्युँत्याउन गरिएको कोशिसजस्तै रहेको टिप्पणी गरेका छन् । आज (आइतबार) रिपोर्टर्स क्लब नेपालको २७औं वार्षिकोत्सवलाई सम्बोधन गर्दै उनले अब नेपालमा कहिल्यै पनि राजतन्त्र फर्काउन नसकिने बताएका हुन् । ‘समाप्त भएको राजतन्त्रलाई व्युँताउने कोशिस गरिँदै छ । यो वास्तवमा घाटबाट मुर्दालाई व्युँताउने कोशिस जस्तै हो । नेपालमा राजतन्त्र कहिल्यै पनि फर्काउन सकिँदैन । राजतन्त्र शासन सत्तामा आउन सक्दैन,’– उनले भने ।

राजतन्त्रका हिमायतीहरुको वास्तविक चरित्र दुई दिन अगाडि (चैत १५ गते) को घटनामा प्रकट भएको पनि उनले बताए । मन्त्री पौडेलले राजतन्त्रको विद्रुप अनुहार सडकमा देखिएको र पोखिएको टिप्पणी गरे । राजतन्त्रवादीहरु हिंसा, आतङ्क, लुटपाटको पक्षमा र नेपाली जनताको मौलिक हकको विरुद्धमा छन् भन्ने कुरा गत शुक्रबारको घटनाबाट पुष्टि भएको उनले बताए । मन्त्री पौडेलले गत शुक्रबार (चैत १५ गते) को हिंसात्मक घटनाले राजतन्त्रवादीहरुको मुकुण्डो उत्रिएको बताए । त्यस्ता तत्वहरुलाई ठीक ढंगले चिन्न जरुरी रहेको पनि उनले भनाइ छ ।

अब कहिल्यै पनि राजतन्त्रवादीहरुले शीर उठाउन नसक्ने गरेर लोकतान्त्रिक गणतन्त्रका पक्षधरहरुले परिष्कृत गरेर अगाडि बढाउन जरुरी रहेको उनले बताए । सरकार र सरकारमा रहेका राजनीतिक दल र संघीय लोकतान्त्रिक गणतन्त्रको पक्षमा उभिएका सबै राजनीतिक दलहरु व्यवस्थाको पक्षमा दृढताको साथ उभिन तयार रहेको पनि उनले बताए । अधिनायकवाद, निरङ्कुशता, हिंसा, आतङ्क र प्रतिगमनका पक्षधरहरुलाई कहिल्यै पनि शीर उठाउन नसक्नेगरी परास्त गर्न र उनीहरुलाई किनारा लगाउन गणतन्त्रका पक्षधरहरु एकजुट हुनपर्ने र लाग्नुपर्ने उनको भनाइ थियो ।