काठमाडौं, १७ चैत्र । नेपाली कांग्रेसका वरिष्ठ नेता पूर्व उपप्रधानमन्त्री गोपालमान श्रेष्ठले तिनकुनेको घट्नामा संलग्न दोषीहरुलाई कारबाही गर्न माग गरेका छन् । उनले भने,‘नेपाल सरकारलाई आग्रह गर्छु कि त्यस घट्नाको छानबिन गरेर आतंककारीलाई र हिंस्रक तत्वलाई कारबाही गर्न माग गर्दछु । यस्तो घट्ना नदोहोरियोस भनेर आग्रह गर्न चाहन्छु ।’
रिपोर्टर्स क्लब नेपालको २७औं वार्षिकोत्सव समारोहलाई सम्बोधन गर्दै उनले यस्तो बताएका हुन् । उनले भने,‘अहिले राजा आउ, देश बचाउ भनेर नारा लगाएका छन् । काठमाडौंको मुटुमा भएको घट्ना निन्दनीय छ । सुनियोजित तरिकाले घट्ना घटार्ईको छ । लुटपाट भएको छ । आगजानी भएको छ । पत्रकार मित्रलाई जिउँदै मार्ने काम भएको छ । यसको जिम्मेवारी आन्दोलनको निर्देशन दिने, कमाण्डर बनाउनेले पनि जिम्मेवारी लिनुपर्छ ।’
उनले राजाको शासनमा प्रश्न गर्न नपाईने भएपनि अहिले प्रश्न गर्न पाईएको बताए । उनले भने,‘यो देशमा गणतन्त्र स्थापना भएको १८ वर्ष लागिसक्यो । लोकतन्त्र ल्याउन, गणतन्त्र ल्याउन सबै पार्टीहरु अग्रसर भएर भूमिका खेले, त्यसबाट हामी नेपालीले अधिकार पाएका छौं । राजाको शासनमा राजासँग प्रश्न गर्न पाईँदैन् । आज प्रजातन्त्रको बेलामा मुलुकका कार्यकारी प्रमुखलाई प्रश्न गर्न पाईन्छ । लागेका कुरा भन्न पाईन्छ । राख्न पाईन्छ ।’ सो क्रममा उनले क्लब र यसका सभापति ऋषि धमलाको सक्रियताको प्रशंसा गर्दै आगामी दिनको लागि शुभकामना दिए ।
प्रतिक्रिया