तीनकुनेको हिंसात्मक प्रदर्शनको क्षतिपूर्ति राजावादीबाटै भराउन समाजवादी मोर्चाको माग

काठमाडौं, १८ चैत । नेकपा (माओवादी केन्द्र) सहित चार दलीय समाजवादी मोर्चाले तीनकुनेको हिंसात्मक प्रदर्शनको क्रममा भएको क्षतिको क्षतिपूर्ति राजावादी समूहबाटै भराउनुपर्ने माग गरेको छ । आज (सोमबार) मोर्चाको बैठकले जो मान्छेले क्षति गरेको छ, उसैबाट भराइनुपर्ने निष्कर्षसहित सरकारलाई सुझाव दिएको हो ।

‘यो घटना डिजाइन गरेर जति क्षति भएको छ, सबैको क्षतिपूर्तिका लागि पनि सरकारसँग कुरा गर्नुपर्छ । जो मान्छेले क्षति गरे त्यो मान्छेबाट सरकारले क्षतिपूर्ति भराउनुपर्छ,’– नेपाल कम्युनिष्ट पार्टीका प्रवक्ता खड्गबहादुर विश्वकर्मा ‘प्रकाण्ड’ ले बैठकको निर्णय सार्वजनिक गर्दै भने ।

गत शुक्रबार तीनकुनेमा राजावादी समूहले गरेको प्रदर्शनमा एक पत्रकारसहित २ जनाको मृत्यु भएको थियो । सो क्रममा प्रदर्शनकारीहरुले व्यक्तिगत भवन, व्यवसायिक भवन, सार्वजनिक सम्पत्तिमा तोडफोड, आगजनी र लुटपाट गरेका थिए ।