सविन महर्जनमाथि पछाडिबाट गोली हानियो, यसको न्यायिक छानबिन माग गर्दछौं : मनिष झा

काठमाडौं, १८ चैत्र । रास्वपाका सांसद मनिष झाले तिनकुने घट्नामा सरकार एक पक्षलाई दोषी देखाएर उम्कन नपाउने बताएका छन् । प्रतिनिधिसभाको आजको बैठकमा बोल्दै झाले तिनकुने प्रदर्शनमा गृह प्रशासनले जम्मा ४ हजार मान्छे आएको भनेको थियो भन्दै त्यो संख्या किन सम्हाल्न सकिएन भनेर सरकारमाथि प्रश्न गरे ।

उनले भने,‘प्रधानमन्त्रीजीले अघिल्लो दिन १०–१५ हजार मान्छे ओहोरदोहोर गरिरहन्छन् भन्नुभएको थियो, गृह प्रशासनले चार मान्छे किन सम्हाल्न सकेन ? सविन महर्जनमाथि गोली लागेको थियो, उ ढुंगा हानिरहेको थिएन, उ हिँडेर फर्किरहेको बेलामा पछाडिबाट गोली हानिएको छ । भिडिओ अहिले छ्याप्छ्याप्ती छ ।’ पत्रकार सुरेश रजकपनि कोठाको कुनामा छलेर मृत्युवरण गर्न परेको भन्दै त्यसमा पनि शंका गर्ने यथेष्ट ठाउँ रहेको भन्दै सबै पक्ष जिम्मेवार हुनुपर्ने बताए ।