मनहरी, १८ चैत । बागमती प्रदेशका प्रदेश प्रमुख दीपकप्रसाद देवकोटाले समृद्ध समाज निर्माणमा ईद पर्वले थप ऊर्जा दिने विश्वास व्यक्त गरेका छन् ।
इस्लाम धर्मावलम्बीले मनाउने महत्त्वपूर्ण पर्व ईदको अवसरमा आज शुभकामना सन्देश दिँदै प्रदेश प्रमुख देवकोटाले नेपाल बहुजातीय, बहुभाषिक, बहुधार्मिक, बहुसांस्कृतिक विशेषतायुक्त विविधतामा एकता, सामाजिक, सांस्कृतिक सद्भावपूर्ण राष्ट्र भएको उल्लेख गरेका छन् ।
नेपालको भौगोलिक विविधताअनुसार कला संस्कृति र परम्परामा पनि बहुआयामिकता रहेको उल्लेख गर्दै उनले भनेका छन्, “नेपालमा हिन्दू, बौद्ध, इस्लाम तथा इसाई धर्माबलम्बीहरूबीच उच्चस्तरीय सहिष्णुता कायम छ, नेपालीहरूको आफ्नै चाडपर्वमध्येको ईद पनि एक हो ।”
ईद (उल) फित्रको सुखद अवसरमा बागमती प्रदेश, स्वदेश तथा विदेशमा रहनुहुने सम्पूर्ण इस्लाम धर्मका अनुयायी दाजुभाइदिदीबहिनीमा सुख, शान्ति एवं सु–स्वास्थ्यको शुभकामना व्यक्त गरेका छन् ।
धार्मिक आस्था र परम्पराले एकता, भातृत्व र मेलमिलापको भावनालाई सुदृढ बनाइ सभ्य र समृद्ध समाज निर्माणमा टेवा पुर्याउने उनले बताएका हुन् । रासस
प्रतिक्रिया