अभिव्यक्ति शैली सच्याउने प्रतिवद्धतासहित मन्त्री गुरुङले मागे माफी

काठमाडौं, १८ चैत । सञ्चार तथा सूचना प्रविधिमन्त्री पृथ्वीसुब्बा गुरुङले राष्ट्रिय सभा बैठकमा माफी मागेका छन् । आफ्नो विगतमा अभिव्यक्तिले राष्ट्रिय सभा सदस्यहरुको भावनामा चोट पुगेको महशुस भएको बताउँदै उनले माफी मागेका हुन् । मन्त्री गुरुङले आफ्नो अभिव्यक्तिको शैली सच्याउने प्रतिवद्धतासमेत व्यक्त गरे ।

‘मेरो जिब्रो सोझो छ, सिधा छ, घुमाउरो छैन । मैले कुनै माननियको अपमान गर्ने ढङ्गले बोलेको छैन । मेरो मनमा एकरति पनि छैन । तर, विगतको छलफलमा मैले जे–जे शब्दहरु प्रयोग गरेँ, उखान टुक्काहरु हाले, विभिन्न जे–जे खालको बिम्बहरु प्रयोग गरेँ । त्यसले तपाईँहरुको भावनामा चोट पुग्यो भन्ने फिल भयो अहिले तपाईँहरु बोल्दाखेरि । म आफ्नो यो शैलीले गर्दा तपाईँहरुलाई चोट लागेछ भने शैली सच्याउने प्रतिवद्धता जाहेर गर्छु,’– उनले भने । File Photo/RN