तीनकुने घटनाका दोषीलाई कारबाहीको दायरामा ल्याउन माग

काठमाडौँ, १८ चैत । सांसद रामप्रकाश चौधरीले काठमाडौँको तीनकुनेमा यही चैत १५ गते भएको घटनाका दोषीलाई कारबाहीको दायरामा ल्याएर आगामी दिनमा त्यस्ता गतिविधि दोहोरिन नदिन सरकारको ध्यानाकर्षण गराए ।

प्रतिनिधिसभाको आजको बैठकको विशेष समयमा सांसद प्रेम सुवालले प्रधानमन्त्री केपी शर्मा ओलीले गर्न लागेको थाइल्याण्डको औपचारिक भ्रमण र बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक) को छैटौँ शिखर सम्मेलनको कार्यसूचीका बारेमा थप प्रस्ट पार्नुपर्ने बताए ।

सांसद सुवालले भ्रमणका क्रममा कुनै पनि सम्झौता गर्नुपर्ने भए नेपाली जनतालाई जानकारी गराउनुपर्ने उल्लेख गरे । उनले तीनकुने घटनामा ज्यान गुमाएका व्यक्तिका लागि सरकारका तर्फबाट उचित राहत र क्षतिप्रर्तिको प्रबन्ध गर्नुपर्ने बताए ।

सांसद चित्रबहादुर केसीले राजनीतिक दलका बीचमा मतभेद भए पनि लोकतन्त्र र गणतन्त्रका सवालमा कुनै विवाद र द्विविधा नभएको तथा विगतका गल्ती कमजोरी दोहो¥याउन नहुने बताए । उनले काठमाडौँको तीनकुने घटनाबाट ज्ञान लिएर गल्ती कमजोरी सुधार गरेर जनतालाई विश्वासमा लिनुपर्ने बताए।

सांसद राजेन्द्रकुमार केसीले काठमाडौँको तीनकुनेमा पूर्वराजा समर्थकले आयोजना गरेको प्रदर्शनमा परी निधन भएकामा दुई जनालाई उचित राहत तथा क्षतिपूर्तिको माग गरे । उनले सो घटनाका बारेमा सत्यतथ्य पत्ता लगाउन आग्रह गरे । लामो समय लोतान्त्रिक गणतन्त्र स्थापनाका सन्दर्भमा भएका आन्दोलनमा कुनै पनि लुटपाट नभएको जानकारी दिँदै उनले गैरकानुनी रुपमा भएका गतिविधिलाई नियन्त्रणमा लिन र कारबाहीको दायरामा ल्याउनुपर्ने बताए । रासस