काठमाडौं, १८ चैत । राष्ट्रिय स्वतन्त्र पार्टी (रास्वपा) का सभापति रवि लामिछानेले दुई ठूला राजनीतिक दलको दुई तिहाइको सरकार पूर्ण रुपमा असफल भएको बताएका छन् । आज (सोमबार) बाट जिम्मेवारीमा फर्किएका लामिछानेले आफूले यो सरकार बन्ने बेलामा नै संसद्बाटै यो सरकार सफल नहुने दाबी गरेको र आज परिणामले त्यसलाई पुष्टि गरिसकेको बताएका हुन् । सरकार संविधान फेल हुने अवस्थामा पुग्दासमेत अझै नचेतेको टिप्पणी गरे । उनले प्रधानमन्त्रीसमेत रहेका एमाले अध्यक्ष केपी शर्मा ओली र कांग्रेस सभापति शेरबहाद्र देउवातर्फ लक्षित गर्दै भने, ‘मैले संसद्मा उभिएर भनेको थिएँ– दुईवटा ठूलो दलको सरकार, दुई तिहाइको सरकार, यो त सफल हुनेवाला छैन । शब्दमा अन्यथा नलिनुहोला, दुईवटा चोर मिलेर साधु हुँदैनन् ।’
उनले सरकार नैतिक रुपमा असफल भइसकेको बताए । सरकारको औचित्यता नै समाप्त भइसकेको लामिछानेको दाबी छ । ‘सरकार कुन नैतिकताको आधारमा बसेको छ ? मलाई थाहा छैन । सरकारको औचित्यता समाप्त भइसकेको छ । संसदबाट बलियो सरकार बन्ने बाटो पनि दुई ठूला दल मिलेर बन्द गरिदिए । लोकतन्त्र बचाउन, संविधान बचाउन होईन, एकअर्काका भ्रष्टाचारी बचाउन सरकार बनाए,’– उनले भने ।
लोकतन्त्र र गणतन्त्रको आडमा लुटतन्त्र मच्चाइरहेकाहरुलाई खबरदारी गर्न आफू कहिले पनि पछाडि नहट्ने उनले बताए ।
प्रतिक्रिया