काठमाडौं, १८ चैत । नेकपा (एमाले) का महासचिव शंकर पोखरेलले गत शुक्रबार तीनकुनेमा भएको हिंसात्मक प्रदर्शन पूर्वराजा ज्ञानेन्द्रको निर्देशनमा भएको बताएका छन् । आज (सोमबार) पार्टीको बृहत जागरण सभा तथा मोटरसाइकल र्यालीलाई सम्बोधन गर्दै उनले सो प्रदर्शनमा ज्ञानेन्द्रको निर्देशन थिएन भनेर कसैले पनि नपत्याउने बताए ।
उनले आफ्नै निर्देशमा भएको हिंसात्मक आन्दोलनले साह्रा देशवासी पीडित भएको बेलामा पूर्वराजा ज्ञानेन्द्र भने अझै चुप लागेर बसेको बताए । गत फागुन ७ गते ज्ञानेन्द्रले सार्वजनिक गरेको सन्देशले गत शुक्रबारको हिंसात्मक माहोल बनेको उनको दाबी छ ।
‘दुर्गा प्रसाईँको नेतृत्वमा जुन प्रकारको आपराधिक क्रियाकलाप गरियो । पूर्वराजा ज्ञानेन्द्रको निर्देशन छैन भन्ने कुरा कसैले पत्याउँदैन । जसले त्यो आन्दोलनको नेतृत्वको जिम्मा लिएको छ, निर्देशन गरेको छ, परिचालित गरेको छ । पूर्वराजा ज्ञानेन्द्र जनताको यो पीडामा अहिलेसम्म पनि चुप लागेर बसिराखेका छन् । हामी भन्न चाहन्छौं– आज मुलुकमा जुन प्रकारको अराजक स्थिति उत्पन्न भएको छ, फागुन ७ गतेका दिन पूर्वराजा ज्ञानेन्द्रले जुन प्रकारको सम्बोधन गरे,’– उनले भने ।
मुलुकमा गणतन्त्र स्थापनाको महत्वपूर्ण कारक दरबार हत्याकाण्ड रहेको उनको दाबी छ । विरेन्द्रको वंशविनासपछि ज्ञानेन्द्रले अपुतालीमा राजगद्दी पाएको महासचिव पोखरेलको दाबी छ । ‘शाह वंशीय परम्पराको आधारमा भन्ने हो भने उनी राजगद्दीका हकदार नै थिएनन् । अपुतालीमा उनले पाएका थिए । अपुतालीमा पाएको गद्दीलाई, अपुतालीमा पाएको श्रीपेचलाई उनले फेरि तानाशाहीको बाटोमा लैजाने काम गरे । दुई÷दुई पटक उनले नेपालको लोकतन्त्रप्रति घात गर्ने, राजनीतिक दलहरुमाथि प्रतिबन्ध लगाउने, मिडियाहरुमाथि प्रहार गर्ने धृष्टता गरे,’– महासचिव पोखरेलले भने ।
२०६२÷०६३ को आन्दोलनपछि पूर्वराजा ज्ञानेन्द्रले ‘मलाई नेपालमै बस्न दिइयोस्, म व्यापार व्यवसाय गरेर बस्न चाहन्छु । मेरी आमालाई नारायणहिटी दरबारभित्रै बस्न दिइयोस्’ भनेकाले सरकारले उनलाई सुरक्षा,संरक्षणका र पूर्व राष्ट्राध्यक्षको हैसियतमा सम्मान दिएको पनि उनले बताए । पूर्वराजा ज्ञानेन्द्र सरकारले दिएको सम्मानलाई लत्याउँदै संविधान, कानुनका विरुद्धको हर्कत गरेको भन्दै उनले अब नेपाली जनताले नस्वीकार्ने बताए । सरकारले पूर्वराजा ज्ञानेन्द्रलाई दण्डित गर्नेमा पनि महासचिव पोखरेलले विश्वास व्यक्त गरे । नेपाललाई लोकतन्त्रको दिशाबाट पछाडि फर्काउने प्रयास किमार्थ स्वीकार्य नरहेको उनले बताए ।
प्रतिक्रिया