शेखर कोइरालासँग स्वर्णिम वाग्लेको निरन्तर भेटवार्ता

काठमाडौं, १८ चैत्र । राष्ट्रिय स्वतन्त्र पार्टीका उपसभापति डा. स्वर्णिम वाग्ले नेपाली कांग्रेसका वरिष्ठ नेता डा. शेखर कोइरालासँग नियमित सम्वाद र सम्पर्कमा छन् । उनले चैत्र १४ गतेपनि शेखरसँग भेटवार्ता गरेका थिए । उनी नेपाली कांग्रेसभित्र शेखरसँग नै अलिक बढि नजिक छन् ।

लामो समयसम्म कांग्रेसमा रहेका स्वर्णिमले ०७९ को निर्वाचनमा चुनाव लड्न चाहेका थिए । तर, टिकट नै पाएनन् । कांग्रेस सभापति शेरबहादुर देउवा दम्पत्तिसँग उनको दूरी बढेको थियो । देउवाले टिकट नदिएको कारण उनी चुनाव लड्नबाट बञ्चित भए । त्यतिवेलासम्म उनी महामन्त्री गगन थापासँग नजिक मानिन्थे । तर, गगनले पनि उनको लागि पार्टी नेतृत्वसँग लड्न नसकेपछि उनी उपनिर्वाचनमा रास्वपाबाट चुनाव लडे । उनी शानदार मतसहित निर्वाचित भए ।

रास्वपाभित्र नीति निर्माणमा बढि खटिए । सभापति रवि लामिछानेसँग उनको अहिलेसम्म देखिनेगरि विवाद देखिएको छैन । तर, रवि सहकारी प्रकरणमा कानूनी झमेलमा पर्दा उनले कार्यवाहक नेतृत्वको जिम्मेवारी चाहेका थिए । तर, रविले उनलाई नदिएर डिपी अर्याललाई नै नेतृत्व सम्पिए । त्यसपछि भने दुई नेताबीच सुमधुर सम्बन्ध नभएको बताईन्छ । यद्धपी वाग्लेले सभापति लामिछानेको पक्षमा सडकदेखि सदनसम्म दृढताका साथ बचाउ गर्ने गरेका छन् ।

कांग्रेस र एमाले मिलेर रातारात नयाँ सरकार बनाएपछि रवि लामिछाने सहकारी ठगी प्रकरणमा पक्राउ परेका थिए । रास्वपाको पूरै नेतृत्व पँक्ति अहिलेको सरकारप्रति आक्रामक हुँदै आएको छ । त्यसमा सदनमार्फत वाग्लेले पनि सरकारमाथि कडा प्रहार गरिरहेका छन् । रास्वपाभित्र पार्टीको राजनीतिक नीति र लाईन के हुने भन्ने अस्पष्टता थियो ।

तर, जलेश्वर बैठकमार्फत रास्वपा संघीय लोकतान्त्रिक गणतन्त्रप्रति पूर्ण प्रतिबद्ध रहेको कुरा लिखित रुपमै आएको छ । मूल नेतृत्व नै बरु गणतन्त्रप्रति धुलमुल रहँदै आएको बेलामा उपसभापति वाग्लेले नै लिड गरेर पार्टीको राजनीतिक लाईन क्लियर गराएका थिए । अहिले राजावादीहरुको आन्दोलन सलबलाउन थालेपछि रास्वपाको पोजिसन क्लियर नभएको भनेर आवाज उठिरहेको थिाये । राजावादीहरुको आन्दोलनको मुखमा सभापति लामिछानेले क्रान्तिको लागि तयार रहन अपिल गरेका थिए ।

कुलमान घिसिङलाई बर्खास्तगी गरेको दिन लामिछानेले विजुली बत्ति निभएर मैनबत्ति बालेर सांकेतिक विरोध गरेका थिए । यो बीचमा कतै रवि राजावादीहरुको कित्तामा खुल्न लागेका त होईनन भन्ने चासो बढेको थियो । सरकारले पनि हिजो बोलाएको गणतन्त्र पक्षधरहरुको बैठकमा रास्वपा नगएको बताईन्छ । यद्धपी रास्वपाका नेताहरुले भने आफूहरुलाई नबोलाईएको बताउने गरेका छन् । सहकारी प्रकरणमा पक्राउ परेर अहिले धरौटीमा रिहा भएपछि रवि आज १६५ दिनपछि पार्टीको जिम्मेवारीमा फर्किएका हुन् । उनी सभापतिको जिम्मेवारीमा फर्किएर पार्टी बैठक नै राखेका छन् ।

बैठक सुरु हुनुअघि उनले मिडियाकर्मी र उपस्थित समर्थकहरुलाई संक्षिप्त सम्बोधन गरेका थिए । जसमा उनले सरकारले आफूलाई जिउँदै छोड्नु नै आफ्नो लागि जित भएको बताए । उनले जतिसुकै तरबार टाउकोमा झुण्ड्याएपनि नडराउने र लुटतन्त्रको विरुद्धमा लडिरहने बताए । उनले आफूलाइृ क कसले फसाएका थिए र को को पक्राउ पर्नुपर्ने थियो भन्ने कुरा आगामी शनिबार चितवनमा सभा आयोजना गरेर इतिवृत्तान्त भन्ने भनेका छन् ।

तर, रविले आज एउटा गम्भीर खुलासा पनि गरेका छन् । जसमा उनले आफ्नो पार्टी विभाजन गराउनको लागि अनेक प्रकारका हर्कतहरु भैरहेको बताएका छन् । उनले भनेका छन्,‘रास्वपा कमजोर बनाउन सकिन्छ कि, रास्वपालाई फुटाउन सकिन्छ, रास्वपालाई टुटाउन सकिन्छ, विभाजित गर्न सकिन्छ कि भन्ने कुरामा मानिसहरु लागिपरेका छन् ।’

तर, कसले फुटाउन लागेको भन्ने खुलाएका छैनन् । आज बैठकमा सहभागी हुनुअघि आयोजित संक्षिप्त सम्बोधनमा नेताहरु डिपी अर्याल र विराजभक्त श्रेष्ठ सहभागी थिए । तर, स्वर्णिम भने उपस्थित् छैनन् । उनी कामविशेषले देशबाहिर रहेको बताईन्छ । यसअघि उनी एक कार्यक्रममा सहभागी हुन भारत पुगेका थिए । रायसिना डायलगमा वक्ताको रुपमा नयाँ दिल्ली पुगेका वाग्लेले भारतीय नेताहरुसँगपनि भेटवार्ता गरेको बताईन्छ । चैत्र १४ गते भने वाग्लेले कांग्रेसका नेता शेखरसँग बालुवाटारमा भेटवार्ता गरेको उच्च स्रोतको दाबी छ ।