सत्तामा बसेकाहरुले काम गर्न नसक्दा राजावादीहरुले धमिलो पानीमा माछा मार्न खोजेः पूर्वप्रधानमन्त्री खनाल (भिडिओसहित)

काठमाडौं, १९ चैत । नेकपा (एकीकृत समाजवादी) का सम्मानित नेता झलनाथ खनालले देशको परिस्थिति जटिल बन्दै गएको बताएका छन् । प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले २०७२ सालमा नयाँ संविधान घोषणा गरिसकेपछि देशको सामाजिक, आर्थिक, सांस्कृतिक र वैदेशिक मामिलामा सरकारले सोचेअनुरुप काम गर्न नसक्दा देश गहिरो संङ्कटमा फसेको बताएका हुन् ।

सङ्कटको फाइदा उठाउन पुनरूत्थानवादीहरु मडारिएर लागिरहेको पनि उनले बताए । पूर्वप्रधानमन्त्री खनालले धमिलो पानीमा माछा मार्नका लागि पुनरूत्थानवादीहरु लागिरेहको बताए । पूर्वराजा ज्ञानेन्द्र शाहको अहिलेको मुभमेन्ट त्यही जालको रुपमा आइरहेको उनले बताए ।

‘यो ज्ञानेन्द्रको मुभमेन्ट भनेकै त्यही जाल हो । जालमाथि जनतालाई विभिन्न ढङ्गले फसाउन सकिन्छ भनेर उनीहरु लागेका छन् । कतिपय मान्छेहरु फस्दै गएको पनि मैले देखिराखेको छु । जनता पनि असन्तुष्ट छन् । स्वभाविक रुपले यो सरकारले काम गर्न सकेन । मुख्य कुरा त सरकारको कमजोरी हो । जनतालाई ठीक ढङ्गले मार्गदर्शन गर्न सकेन,’– नेता खनालले भने ।

सत्तामा बसेकाहरुले काम गर्न नसक्दा देश अप्ठ्यारोमा पर्न स्वभविक रहेको उनले बताए । राष्ट्रिय एकता कायम गरेर विगतमा गर्न नसकिएको कामहरु गर्न सकिने ढङ्गले अबको नीति र कार्यक्रम अगाडि बढाउनुपर्ने उनले बताए । नेता खनालले त्यसको मियो भनेको वामपन्थी एकता नै रहेको उनको दाबी छ । आफूले वामपन्थी एकताको लागि धेरै पहिलादेखि पहल गर्दै आएको उनले बताए । संघीय लोकतान्त्रिक गणतन्त्र वामपन्थीहरुको नीति रहेकाले उनीहरु मिलेर अगाडि बढ्नुको विकल्प नरहेको उनले बताए ।

गत शुक्रबार काठमाडौंको तीनकुनेमा भएको प्रदर्शनको क्रममा राजावादीहरुले ताण्डव नृत्व नै मच्चाएको उनको दाबी छ । यो नेपालमा इतिहासमै लज्जास्पद र घृणास्पद रहेको उनले बताए । सो क्रममा राजावादीहरुले आफ्नो पार्टी कार्यालयमा पेट्रोल बम हानेको उनको भनाइ छ ।