वामपन्थीहरुको सरकार अबको निकास रहेको झलनाथको दाबी, कांग्रेसलाई प्रतिपक्षमा बस्न सुझाव (भिडिओसहित)

काठमाडौं, १९ चैत । नेकपा (एकीकृत समाजवादी) का सम्मानित नेता झलनाथ खनालले वर्तमान सरकारप्रति जनताको विश्वास टुटिसकेको बताएका छन् । हिजो (सोमबार) प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले वर्तमान सरकारप्रति पुनर्विचार आवश्यक रहेको बताएका हुन् । उनले वामपन्थीहरु एकतावद्ध भएर सरकार बनाउनु र कांग्रेसलाई बलियो प्रतिपक्षीको रुपमा राख्नु् उपयुक्त हुने बताए । त्यस्तै, उनले राष्ट्रिय सहमतिको सरकार पनि अबको विकल्प हुनसक्ने बताए । उनले वर्तमान सरकारबाट भने अब देशले निकास पाउन नसक्ने बताए ।

‘यो सत्ताप्रति जनताको विश्वास भएन । ती सत्तारूढ दलका साथीहरुले पुनर्विचार गर्नुपर्यो । अब वामपन्थीहरुले नयाँ ढङ्गबाट सोच्नुपर्यो । वामपन्थीहरु मात्रै एकतावद्ध भए भनेपनि नयाँ सरकार बन्छ त । वामपन्थीहरुको एकता र बलियो प्रतिपक्ष, कांग्रेसजस्तो प्रतिपक्ष । कि अब कांग्रेसले अरु सबैलाई मिलाएर सरकार बनाओस् । बलियो प्रतिपक्ष एमाले होस् । होइन भने राष्ट्रिय सरकार बनाएर जाऔं भन्ने हो भने पनि यो छलफलको विषय हुनसक्छ,’– उनले भने ।

उनले अहिलेका सत्ताधारी दलहरुले म्यानपावर कम्पनी खोलेर कमिशन खाएर युवा विदेश पठाउने काम गरिरहेको बताए । अहिले ओहदामा बसिरहेका मान्छेहरुबाटै नक्कली भुटानी शरणार्थी बनाएर बेच्ने काम भएको पनि उनको दाबी छ । ‘यहाँका सत्ताधारी दलहरुले के गर्दैछन् भन्दा म्यानपावर कम्पनी खोलेर तिनीहरुमार्फत कमिशन खाने र मानव तस्करीमा लागिरहेका छन् । त्यतिमात्रै होईन भुटानी शरणार्थी, नक्कली भुटानी शरणार्थी बनाएर बेच्ने काम गरे । त्यसको निम्ति देशका ठूल्ठूला मान्छेहरु, ओहदामा अहिले पनि बसिरहेका मानिसहरु त्यसमा संलग्न छन् भन्ने आम जनतालाई थाहा छ,’– उनले भने ।