धमिलो पानीमा माछा मार्न सकिन्छ कि भनेर रविजी मुद्दा विचाराधीन रहेकै अवस्थामा जिम्मेवारीमा फर्किनुभयोः एमाले नेता रिजाल

काठमाडौं, १९ चैत । नेकपा (एमाले) का युवा नेता विष्णु रिजालले रािष्ट्रय स्वतन्त्र पार्टीका सभापति रवि लामिछाने विभिन्न अदालतमा फौजदारी मुद्दा विचाराधीन रहेकै अवस्थामा जिम्मेवारीमा फर्किनु गलत रहेको बताएका छन् । आज (मंगलबार) नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दैै उनले विभिन्न अदालतमा मुद्दा विचाराधीन रहेको अवस्थामै धमिलो पानीमा माछा मार्न सकिन्छ कि भनेर लामिछाने जिम्मेवारीमा फर्किएको बताएका हुन् ।

‘रविजीले धमिलो पानीमा माछा मार्न खोज्नु भएको छ । अहिले गणतन्त्रविरोधीहरु सल्बलाइरहेको बेलामा, अरु दलहरुको ध्यान यता भएको बेलामा आफूमाथि अभियोग छदा छँदै फेरि कुन नैतिकताले काममा फर्किनुभयो ? थाहा छैन । यो बीचमा के त्यस्तो घटना आयो र रविजीले कहाँ चाहिँ क्लिन चिट पाउनुभयो ? विभिन्न अदालतमा उहाँमाथि मुद्दा छ । आफैंले पनि भन्नु भएको छ । असन्तुष्टिमा खेलेर लाभ लिन सकिन्छ कि भनेर लागेको होला । उहाँलाई नेपालमा कसरी गण्तन्त्र आयो भन्ने थाहा नै छैन । उहाँलाई यसको माया र महत्व नै छैन । उहाँको छोटो सपनाको आयु छोटो नै हुन्छ,’– उनले भने ।