प्रधानमन्त्री ओली र दलका शीर्ष नेताहरुले लोकतन्त्रको मान्यतालाई बुटले कुल्चिएको भीम रावलको आरोप

काठमाडौं, २२ चैत । पूर्व उपप्रधानमन्त्री डा.भीम रावलले राज्य सञ्चालनमा संलग्न रहेका व्यक्तिहरुले तीनकुनेको हिंसात्मक घटनालाई गम्भीर रूपले लिनुपर्ने बताएका छन् । प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले उक्त हिंसात्मक घटनाको दोषी को हो भन्ने कुरा निष्पक्ष छानविन गर्नका लागि न्यायिक छानविन आयोग बन्नुपर्ने बताएका हुन् । उनले उक्त घटनाको न्यायिक छानविन भएर सत्यतथ्य बाहिर आएपछि मात्रै भोलिका दिनमा राज्यप्रति नागरिकहरुको विश्वासनीयता कायम हुने बताएका हुन् । ‘यदि यस्तो कुरालाई एकदम अन्यौलग्रस्त राख्न दिइयो भने यसको पछि धेरै नकरात्मक प्रभावहरु पर्न सक्छन् । त्यसकारण यसको उच्चस्तरीय, निश्पक्ष, न्यायिक छानविन हुनुपर्छ,’– उनले भने ।

नेता रावलले अहिले देशको राजनीति संविधानलाई मिचेर सिद्धान्तहीन, उद्देश्यहीन र गन्तव्यहीन यात्रामा अगाडि बढिरहेको पनि बताए । अहिलेका प्रधानमन्त्री केपी शर्मा अ‍ोली र दलका शीर्ष नेताहरुले लोकतन्त्रको मूल्य, मान्यतालाई कुल्चिएको र संविधान नमानेको उनको आरोप छ । तीन कुनेको हिंसा भड्काउनमा राजनीतिक दल नै जिम्मेवार रहेको उनको आरोप छ ।

‘राजतन्त्र भयो भन्दैमा लोकतन्त्र नहुने भन्ने होईन । यद्यपि म नेपालमा राजा ल्याउनुपर्छ भन्ने तर्क गरिराखेको छैन । बेलायतमा राजतन्त्र छ, लोकतन्त्र छ कि छैन ? नर्बेमा राजातन्त्र छ । यसको अर्थ मैले राजतन्त्र तुरुन्त ल्याउनुुस् भनिराखेको छैन । म के भनिराखेको छु भने लोकतन्त्रका मान्यतालाई सबैभन्दा पहिला प्रधानमन्त्री हुने व्यक्तिले, राजनीतिक दलको शीर्ष नेतृत्वमा हुने व्यक्तिले कार्यान्वयन गर्नु पर्यो कि परेन ? संविधानलाई उहाँहरुले ठाडै किन मिचेको ? संविधानको धारा २६९ लाई बुटले किन कुल्चेको ? संविधानको धारा ५ लाई बुटले किन कुल्चेको ? संविधानको धारा २७९ लाई किन कुल्चेको ? यसको प्रभाव समाजमा के पर्र्छ ?’ उनले भने ।