अमेरिकी नागरिकताका लागि आवेदन दिंदा आवासीय निरन्तरताको नियम लागु हुन्छ । जस अनुशार ग्रिनकार्डवाहक व्यक्ति अमेरिका छाडेको ६ महिनाभित्र अमेरिका भित्र प्रवेश गरेको हुनुपर्छ । ५ बर्षको अवधिमा ३० महिना अमेरिका बसेको हुनुपर्ने प्रावधान त अरु समयको जोडेपनि पुग्छ । तर एकपटककै बसाईमा ६ महिनाभित्र अमेरिकाबाहिर बसेको खण्डमा भौतिक रुपमा आवासीय निरन्तरता भंग हुन्छ ।
अहिले कोरोना भाइरसको महामारीका सन्दर्भमा अमेरिकी सरकारले यसमा कुनै नयाँ प्रावधानको घोषणा गरेको छैन । अहिलेको प्रावधान अनुशार ६ महिनाभन्दा बढी समय बाहिर बसेर अमेरिका आउने ग्रिनकार्डवाहकले भौतिक उपस्थीतिको नियमलाई भंग गरेको ठहर्छ । त्यसमा कुनै छुटको व्यवस्था छैन ।
यदि विदेशमा काम गर्ने अमेरिकी सरकारको कर्मचारी भएको खण्डमा, अन्तर्राष्ट्रिय संस्थामा काम गर्ने व्यक्ति भएको खण्डमा, अमेरिकामा रहेको धार्मिक संस्थाको विदेशमा रहेको काममा गएको खण्डमा सुविधा पाउने प्रावधान युएससीआईएसमा छ । अमेरिकी सेनामा रहेका व्यक्तिका ग्रिनकार्डवाहक परिवार जागिरको कारणले ६ महिनाभित्र अमेरिका आउन नसकेका पनि छुट पाउन सक्छन् ।
६ महिनाभन्दा लामो समय अमेरिकाबाहिर बसेको व्यक्तिले छुटका लागि एन ४७० आवेदन भर्नुपर्छ । खासगरी एकबर्षका लागि वा त्यो भन्दा पनि लामोसमय अमेरिकाबाहिर बस्नुपरेको अवस्थामा र भविश्यमा अमेरिकी नागरिकताको लागि आवेदन दिने योजना भएकाले यो आवेदन दिनुपर्छ । यदि अमेरिकी नागरिकताका लागि अन्य योग्यता पूरा गरेको छ र अमेरिकाबाहिर निश्चित संस्थामा काम गर्ने अमेरिकी नागरिकसँग विवाह गरेको छ भने यो फर्म भर्नुनपर्ने हुनसक्छ । तर यो फर्म माथि उल्लेख गरिएकोजस्तो निश्चित रोजगारी उद्देश्यका लागिमात्र हो, सबै ग्रिनकार्डवाहकका लागि होइन । यो फर्म भर्दा ३५५ डलर तिर्नुपर्छ ।
अन्य व्यक्ति डिभी लोटरी परेर आएका, रोगारमा आधारित ग्रिनकार्ड पाएका तथा नेपालमा घुम्न वा परिवार भेट्न गएकाहरुलाई यो सुविधा छैन । उहाँहरु अमेरिका आउने योजना गर्दागर्दै नेपालमा अड्किरहनुभएको छ भने र उहाँहरुको बसाईको ६ महिनाको अवधि पूरा हुँदैछ भने अहिलेसम्मका नियम अनुशार उहाँहरुलाई कुनै पनि प्रकारको सुविधा छैन ।
तर यो उहाँहरुको काबु बाहिरको अवस्थाका कारण भएकाले र आकस्मिक रुपमा भएकाले उहाँहरुले यथाशक्य अमेरिकी दूतावास वा कन्सुलेटमा सम्पर्क गरेर आफ्नो अवस्था बताउनुपर्छ । आफूहरु ६ महिनाभन्दा बढी बस्न नचाहेको तर आफ्नो काबु बाहिरको असाधारण अवस्थाका कारण बस्नुपरेको जानकारी गराएपछि उनीहरुलाई छुटको सुविधा हुनसक्छ । अमेरिकी दूतावास काठमाडौंले यसबारेमा कुनै सुचना वा जानकारी त गराएको छैन । तर असाधारण अवस्थाहुँदा त्यस्ता कैयन छुट र माफी दिन सकिने कुरा अमेरिकी कानुनमा सधै उल्लेख भएको हुन्छ ।
त्यसैले अमेरिकी दूतावासमा तत्कालै सम्पर्क गरेर आफ्नो अवस्थाबारे जानकारी दिनुपर्छ । यसो भएमा दूतावासले उपयुक्त सुझाव दिनसक्छ ।-खसोखासबाट
