भक्तपुर, २६ साउन । नेपाली काँग्रेसकी नेत्री सुजाता कोइरालाले तोकिएकै समयसीमाभित्र केन्द्र र प्रदेशको निर्वाचन सम्पन्न गर्न आवश्यक कानुन छिटोभन्दा छिटो पारित गर्नुपर्ने बताउनुभएको छ ।
रफत सञ्चार क्लबद्वारा आज आयोजित साक्षात्कार कार्यक्रममा नेत्री कोइरालाले तराईका जनता निर्वाचन पर्खेर बसेकाले सरकार र निर्वाचन आयोगले तत्काल प्रक्रिया अघि बढाएर विधेयक र नीतिहरु पारित गर्नुपर्ने बताउनुभयो ।
“निर्वाचनमा जीत वा हार भन्दा पनि निर्वाचन समयमै गराउनु महत्वपूर्ण कुरा हो,” कोइरालाले भन्नुभयो – “सबैलाई समेटेर तीनै तहको निर्वाचन सहज रुपमा सम्पन्न गर्नुपर्छ ।”
पछिल्लो समय भारत र नेपालबीच चिसिएको सम्बन्धलाई सुधार्न प्रधानमन्त्री शेरबहादुर देउवाको भ्रमण उपयोगी हुने विश्वास पनि उहाँले प्रकट गर्नुभयो ।
राजनीतिक दलहरुबीचको सहमति र सहकार्य मजबुत भएको अवस्थामा बाह्य शक्तिले हस्तक्षेप गर्न नसक्ने उहाँले बताउनुभयो । पछिल्लो समय राप्रपामा आएको फूट अपरिपक्व राजनीतिक खेल भएको उहाँको टिप्पणी थियो । रासस
