काठमाडौं २५ असोज ।
कांग्रेसका ६८ जिल्ला कार्यसमितिले प्रतिनिधिसभा र प्रदेशसभाको प्रत्यक्ष तथा समानुपातिकतर्फका उम्मेदवारको सूची केन्द्रीय कार्यसमितिमा पठाएका छन् । असोज १७ सम्म उम्मेदवारको सिफारिस गर्न निर्देशन दिईएपनि अझै ९ जिल्लाले सूची पठाएका छैनन् ।
उम्मेदवारको सूची नआउनेमा प्रदेश २ का पर्साबाहेक ७ जिल्ला छन् । रुकुम र रोल्पाले पनि सूची पठाएका छैनन् । प्रतिनिधिसभाका लागि ३० जिल्ला र प्रदेशसभाका लागि ६ जिल्लाले सर्वसम्मत उम्मेदवारको सूची पठाएको कांग्रेस केन्द्रीय कार्यालयका सचिव कृष्ण केसीले बताए ।
कांग्रेस नेतृत्वमा चुनावी तालमेलका लागि छलफल चलिरहेका कारण प्रदेश २ को सूची पठाउन जिल्ला कार्यसमितिले ढिलाइ गरेका हुन् । कांग्रेस नेतृत्वमा लोकतान्त्रिक गठबन्धन निर्माणका लागि आबद्ध ६ दलबीच निर्वाचन क्षेत्र बाँडफाँटबारे छलफल चलिरहेको छ । सिट बाँडफाँटमा प्रदेश २ मा नै मुख्य समस्या देखिएको छ । राष्ट्रिय जनता पार्टी (राजपा) र संघीय समाजवादी फोरमको प्रभाव क्षेत्र रहेको यो प्रदेशमा कांग्रेस, राजपा र फोरमबीच सिट बाँडफाँट गर्न छलफल चलिरहेको छ ।
राजपा र फोरम गठबन्धनले ३२ निर्वाचन क्षेत्र रहेको प्रदेश २ बाट प्रतिनिधिसभामा २४ र प्रदेशसभाका लागि ४८ सिट माग गरेको छ । कार्यदल बैठकमा राजपा र फोरमले प्रतिनिधिसभामा ५५ र प्रदेशसभामा १ सय ३१ सिट माग गरेपछि ६ दलबीच दुई दिनदेखि बैठकसमेत बस्न सकेको छैन । कांग्रेसबाट कार्यदल सदस्य पूर्णबहादुर खडकाले दुई दिनदेखि बैठक नभएको बताउँदै कार्यदलका संयोजकले अनौपचारिक संवाद गरेको बताए । कार्यदलको संयोजकमा कांग्रेस नेता विमलेन्द्र निधि छन् ।
कांग्रेसमा संसदीय बोर्ड गठन आज
कांग्रेसले उम्मेदवार चयनका लागि बुधबार संसदीय समिति बनाउने भएको छ । समिति बनाउन दुई दिनदेखि शीर्ष नेतृत्वबीच छलफल चलिरहेकामा मंगलबार साँझ सहमति जुटेको प्रधानमन्त्रीनिकट स्रोतले बतायो । संसदीय समिति पार्टीबाट उम्मेदवार चयन गर्ने निकाय हो । संसदीय समितिमा पार्टी सभापति शेरबहादुर देउवाले विधानअनुसार केन्द्रीय कार्यसमितिबाट अनुमोदन हुने गरी ८ जना मनोनयन गर्न पाउँछन् ।
जसअनुसार उनले वरिष्ठ नेता रामचन्द्र पौडेल, केन्द्रीय सदस्यहरू प्रकाशमान सिंह, विमलेन्द्र निधि, कृष्णप्रसाद सिटौला, गोपालमान श्रेष्ठ, पूर्णबहादुर खडका, ज्ञानेन्द्रबहादुर कार्की, रामशरण महतलगायत ल्याउने तयारी गरेको स्रोतले बतायो । पार्टीका पदाधिकारी संसदीय समितिको पदेन सदस्य हुने व्यवस्था छ । संसदीय समिति गठनका लागि केन्द्रीय कार्यसमितिको बैठकसमेत बुधबार बोलाउने सम्भावना छ । कान्तिपुरबाट
