काठमाडौं, १२ कार्तिक । सूचना र प्रविधिको विकाससँगै नेपाली साहित्यको विकास र प्रसारमा निकै टेवा पुर्याइरहेको छ । विभिन्न अनलाइन र युट्युव च्यानलहरुमा विभिन्न कवि तथा साहित्यकारहरुका रचना, अन्तरर्वार्ता विश्वको जुनसुकै कुनामा पनि इन्टरनेटमार्फत् पढ्न, सुन्न र हेर्न पाइन्छ ।
तर जति मात्रामा साहित्यको विकास हुनुपर्ने हो, त्यो नभइरहेको कुरामा कसैको मतान्तर नहोला । नेपाली साहित्यको गरिमा, विकास र प्रचारको कमी जोसुकैले महसुस गर्न सकेको विषय हो ।
अझ, कवि, लेखक तथा साहित्यकारहरुको इन्टरनेटमा पहुँच भए पनि यसको माध्यमबाट रचनाहरु विभिन्न तरिकाले प्रसार गर्न सकिन्छ भन्ने चेतना भने कम भएको हुन सक्छ ।
त्यसकारण, सूचना र प्रविधिको पहुँचमा रहेका र जानकार कवि, रचनाकारहरुको इन्टरनेटमा राम्रै उपस्थिति भए पनि धेरै यस्ता रचनाकारहरु छन् जसको लेख, रचना कुनै कवि गोष्टी या बन्द कोठामा खिचिएका वा रेकर्ड गरिएका अडियो र भिडियोहरुमा सीमित छन् ।
अझ कतिपय रचनाहरु त कापीको पाना वा मोबाइलको नोटबुकमै सीमित रहेका छन् । युट्युव वा अनलाइनमा खोज्ने हो भने नेपाली कवितामा बनेका भिडियोहरु विरलै पाइन्छन् ।
केही चर्चित कविहरुका रचना वाचन वा अन्तर्वार्ताका भिडियोहरु देख्न पाइन्छ तर यो पर्याप्त त छँदै छैन । सूचना र प्रविधिमय भइरहेको अहिलेको समयमा दर्शक र स्रोताहरु पनि निकै अघि बढिरहेका छन् तर खोजेजस्ता रचनाहरुको भिडियो पाउन भने मुस्किल नै छ ।
दैलो आर्टस् समूहले ‘पर्म कविता शृङ्खला’ मार्फत् विभिन्न नेपाली कवि, रचनाकारहरुको कविता तथा गीतको कलात्मक प्रस्तुति गर्ने हेतुले कविताहरुलाई भिडियोमा उतार्ने गरेको छ । ‘आधा कविता’,‘पर्म कविता शृङ्खला’ अन्तर्गत कवि असीम सागरको बहुचर्चित कविता ‘पसिनाको जुलुस’ को भिडियो छायाङ्कन गरिएको छ ।
यसमा कवितामा कवि असीम सागरसँगै कलाकार दीपिका ढकालको सशक्त अभिनय रहेको छ भने प्रकेश सिन्धुलीयको निर्देशन रहेको छ ।
