काठमाडौं, २३ जेठ । अभिनेत्री ऋचा सिंह ठकुरी अभिनित ‘यो पागल मन’ को अफिसियल ट्रेलर सार्वजनिक भएको छ । नायिका ठकुरी र अभिनेता विनोद न्यौपानेको प्रेममा राजेश ढुंगाना भिलेन बनेको देख्न सकिन्छ ।
मंगलवार राजधानीमा आयोजित एक कार्यक्रमकाबीच कलाकार र निर्माण टीमको उपस्थितिमा अलचित्रको ट्रेलर सार्वजनिक गरिएको हो ।
असार २९ गतेबाट प्रदर्शन हुन लागेको कल्याण अधिकारी निर्देशित यस फिल्मलाई बिरेन्द्र कुमार यादब र कल्याणले मिलेर निर्माण गरेका हुन् । गौरी मल्ल, मनिष भण्डारी, बिशाल श्रेष्ठ, एनी कुँवरलगायतका कलाकारहरुको पनि यो फिल्ममा अभिनय छ ।
अर्जुन पोखरेलको संगीत रहेको फिल्मलाई शम्भु सापकोटाले खिचेका हुन् । अनिल गौतमले यसमा सम्पादनको जिम्मेवारी सम्हालेका छन् ।
कमल राइको कोरियोग्राफी रहेको ‘यो पागल मन’ मा द्वन्द निर्देशन राजु किराँतीको रहेको छ भने सामिप्यराज तिमल्सिनाले पटकथा तथा संवाद लेखेका हुन् ।
