काठमाडौं, २९ असार । नायक आर्यन सिग्देल र नायिका साम्राज्ञी राज्यलक्ष्मी शाहको अभिनय रहेको चलचित्र ‘कायरा’ मा समाहित पहिलो गीत सार्वजनिक गरिएको छ ।
दुई हप्ता अघि चलचित्रको ट्रेलरले सकारात्मक प्रतिक्रिया पाइरहँदा निर्माण टिमले ‘सुखमा’ बोलको रोमान्टिक गीत सार्वजनिक गरेको हो ।सार्वजनिक गीतमा केतन क्षेत्रीले स्वर दिएका छन् भने कोशिश क्षेत्रीको शब्द तथा संगीत छ । प्रविण सिंहको कोरियोग्राफी रहेको छ ।
निर्देशक लक्ष्मण रिजाल रहेको चलचित्रमा शिशिर राणा, हितेश शर्मा, मरिषा श्रेष्ठलगायतका कलाकारहरु अभिनय रहेको छ । कोशिश क्षेत्री, अर्जुन पोखरेल र कल्याण सिंहको संगीत रहेको ‘कायरा’ का गीतमा प्रविण सिंहले कोरियोग्राफी गरेका छन् ।
आर्यन सिग्देलकै कथा रहेको यसमा स्क्रिन प्ले र डाइलग केदार भुषालको छ भने निर्मातामा निर्देशक रिजाल छन् । यो चलचित्रको बनिष शाह र मिलन श्रेष्ठले सम्पादन गर्नेछन् ।
शिवराम श्रेष्ठले फिल्मका हरेक सिन खिचेका हुन् । राजकुमार भट्ट कार्यकारी निर्माता रहेको ‘कायरा’ मा दिनेश थापा र दिवस पराजुली सह निर्मातामा रहेका छन् । चलचित्रको प्रदर्शन मिति साउन १८ गतेलाई तय गरिएको छ ।
