बैतडी, ११ साउन । लक्ष्यअनुसार काम नहुँदा प्रदेश नं ७ को दोस्रो ठूलो बैतडीस्थित पाटन विमानस्थल कालोपत्र गर्ने कार्य अधुरै रहन पुगेको छ । गत असारमा सक्ने लक्ष्यसहित निर्माण कार्य शुरु गरिएको विमानस्थलको कालोपत्र गर्ने कार्य अझै सकिएको छैन । गत आवको असार मसान्तसम्ममा कालोपत्र गरिसक्ने लक्ष्यसहित गत भदौमा काम शुरु भएको थियो ।
कालोपत्र गर्न कात्तिकसम्म कुर्नुपर्ने निर्माण कम्पनी ग्याल्वा च्यामलिंगा जगदम्बा जेभीले जनाएको छ । विमानस्थलमा कटिङ, फिटिङ र सब–बेसको काम सकिएको निर्माण कम्पनीका इन्जिनियर पुरन रावलले बताउनुभयो ।
“असारमा सक्ने लक्ष्य भएपनि बेलाबेला वर्षा भएर कालोपत्र गर्ने काम नसकिएको हो” उहाँले भन्नुभयो – “ठेक्का भइसकेपछि विविध कारण काम समयमै शुरु हुन नसकेर पनि समस्या भएको हो ।”
अहिलेसम्म विमानस्थलको ७५ प्रतिशत काम सम्पन्न भएको उहाँको दाबी छ । तर, विमानस्थल स्तरोन्नति गर्ने कार्य ५० प्रतिशत मात्रै सकिएको नागरिक उड्डयन प्राधिकरणका उपनिर्देशक एवं सूचना अधिकारी त्रिलोचन पौड्यालले बताउनुहुन्छ ।
सार्वजनिक खरिद नियमावली २०६४ अनुसार निर्माण कम्पनीलाई थप ६ महिनाको म्याद दिने गृहकार्य भइरहेको छ । उहाँले भन्नुभयो – “थपिएको म्यादभित्र विमानस्थल कालोपत्र गरिसक्नुपर्नेछ ।”
रु ११ करोड २९ लाखको लागतमा निर्माण भइरहेको पाटन विमानस्थलमा ५९० मिटर लम्बाइ र २० मिटर चौडाइको रनवे कालोपत्र गरिनेछ भने ७० मिटर लम्बाइ र ३० मिटर चौडाइको एप्रोन कालोपत्र गरिनेछ ।
झण्डै दुई दशकदेखि बन्द रहेको पाटन विमानस्थललाई स्तरोन्नति गरी पुनः सञ्चालनमा ल्याउन आव २०७२÷७३ मा सरकारले बजेट विनियोजन गरेको थियो ।
सोहीअनुसार दुई वर्ष अगाडि विमानस्थल सञ्चालनका लागि विस्तृत अध्ययन प्रतिवेदन डिपिआर तयार पारिएको थियो । डिपिआरअनुसार विमानस्थललाई स्तरोन्नति गर्न ठेक्का आह्वान गरेर काम शुरु गरिएको हो । यो प्रदेश नं ७ सुदूरपश्चिममा कैलालीको गेटा विमानस्थल पछिको सबैभन्दा ठूलो विमानस्थल हो ।
गएको असारमा सक्ने भनिएको कालोपत्र गर्ने कार्य समयमा नसकिने भएपछि स्थानीय बासिन्दा निराश भएका छन् ।विमानस्थल कालोपत्र भई सञ्चालनमा आउने आशमा रहेका यहाँका जनतामा निराशा छाएको स्थानीय कपिल केसीले बताउनुभयो ।
उहाँले भन्नुभयो – “आर्थिक गतिविधि बढ्ने र पर्यटन प्रर्वद्धन हुने आशामा रहेका नागरिकमा निराशा छाएको छ ।” पाटनमा २०३२ सालमा विमानस्थलको निर्माण शुरु भई २०३५ सालदेखि कच्ची मैदानबाट हवाई सेवा शुरु गरिएको थियो । विसं २०५२ मा भने विमानस्थल बन्द भयो ।
पहाडी जिल्लामा सडक सञ्जाल पुगेको र यात्रु कम भएको कारण देखाएर विमानस्थल बन्द गरिएको थियो । विसं २०५८ मा तत्कालीन माओवादीले टावरमा आगो लगाएर ध्वस्त पारेपछि विमानस्थल अलपत्र परेको थियो ।
पाटन विमानस्थल कालोपत्र भएर सञ्चालनमा आइदिए यस क्षेत्रको धार्मिक पर्यटनको समेत विकास हुने धेरैको विश्वास छ । विमानस्थलको सञ्चालनले भारतीय पर्यटक भित्र्याउन मद्दत पुग्ने र पर्यटन व्यवसाय फस्टाउने स्थानीयवासी दिनेश विष्टको भनाइ छ ।
नेपाल सरकारले घोषणा गरेको दश नमूना शहरमध्येको एक शहरमा पर्ने पाटनमा विमानस्थल सञ्चालन हुन सके यो क्षेत्र एक पर्यटकीय गन्तब्य बन्न सक्छ ।
प्रदेश नं ७ सुदूरपश्चिमको पहाडी जिल्ला बैतडी, दार्चुला, डडेल्धुरा र बझाङको मध्यभागमा पर्ने पाटन बैतडीको ‘मिनी’ सदरमुकामको रुपमा परिचित छ ।
यहाँ नेपालकै गहिरो गुफा पत्ताल भुमेश्वर, उदयदेव मन्दिर, त्रिपुरासुन्दरी, निङ्गलाशैनी मन्दिर, ईश्वरी गंगाधाम, मेलौली भगवती मन्दिर, दोगडाधाम, रौलाकेदार मन्दिर, सिगासधाम लगायतका धार्मिक स्थलहरु छन् ।
विमानस्थल सञ्चालन आए बैतडीसहितका जिल्लाको धार्मिक पर्यटकीय क्षेत्रहरुको महत्व बढ्ने तथा सुदूरपश्चिमका जनताको जीवनस्तरमा परिवर्तन आउने स्थानीयवासी कपिल केसी बताउनुहुन्छ । भारतसँग सीमा जोडिएकाले भारतीय पर्यटकसमेत भित्र्याउन सकिने उहाँको विश्वास छ ।
दार्चुलाको अपि हिमाल र बझाङको साइपाल हिमाल यस क्षेत्रका थप आकर्षण हुन् । यस विमानस्थलका कार्यालय भवनहरु द्वन्द्वकालमा ध्वस्त पारिएको थियो ।
दुई दशकसम्म सञ्चालन नभएर गौचरन, खेलमैदान र सवारी चलाउन सिक्ने मैदानमा परिणत भएको यो विमानस्थललाई पुनः सञ्चालनमा ल्याउने प्रयास हुनु खुशीको कुरा हो । थप विलम्ब नगरी यो विमानस्थललाई सञ्चालनमा ल्याउन सकिए सुदूरपश्चिमकै चौतर्फी विकासमा टेवा पुग्ने निर्विवाद छ । रासस
