काठमाडौँ, ६ भदौ । गोरखापत्र दैनिकका पूर्व प्रधानसम्पादक रामचन्द्र न्यौपानेको निधन भएको छ । पूर्व–प्रधानसम्पादक न्यौपानेको आज बिहान चार बजे काठमाडौँ महानगरपालिका-२६ लैनचौरस्थित निवासमा निधन भएको उहाँका भतिजा सन्तोष न्यौपानेले जानकारी दिनुभयो ।
चौरासी वर्षीय न्यौपाने पछिल्लो समय उच्च रक्तचापबाट ग्रसित हुनुहुन्थ्यो । न्यौपानेले गोरखापत्र संस्थानमा करीब तीन दशक विभिन्न पदमा रहेर काम गर्नुभएको थियो ।
पछिल्लो समय उहाँ साप्ताहिक जनसत्ताका प्रधानसम्पादक हुनुुहुन्थ्यो । न्यौपानेका दुई श्रीमती, तीन छोरी र दुई छोरा हुनुहुन्छ । न्यौपानेको आजै पशुपति आर्यघाटमा दाहसंस्कार गरिने उहाँको पारिवारिक स्रोतले जनाएको छ । रासस
