असोज २६, काठमाडौँ । खजुरा गाउँपालिकाले पहिलो पटक विद्यालय तहमा शिक्षक व्यवस्थापनका लागि बजेट विनियोजन गरेको छ ।गाउँपालिकाका स्रोत व्यक्ति टङ्क दाहालका अनुसार छ वटा मावि, १० आधारभूत, तीन प्रावि र तीन मदरसाका लागि अनुदान दिने निर्णय गरिएको हो ।
अमर मावि सिगाउँ, मावि मनकामनापुर, मावि गोदहना, पशुपति मावि घियालाई एक÷एक शिक्षक र जनसेवा मावि गिजरालाई दुई शिक्षकका लागि एक शिक्षक बराबर रु तीन लाखका दरले अनुदान छुट्याउने निर्णय गरिएको छ ।
त्यस्तै जनसेवा मावि गिजरा, मावि मनकामनापुर, पशुपति भानु मावि उढरापुर, आधारभूत नेरा निमावि धौलागिरि, मनकामना इगाउँ, नेरा आदर्श आधारभूत निमावि डिगाउँ, जनकल्यान निमावि गिजरा, आधारभूत प्रावि सिन्दुरीका लागि एक÷एक जना शिक्षक दरबन्दीका लागि एक शिक्षक बराबर वार्षिक रु दुई लाखका दरले बजेट विनियोजन गरिएको शिक्षा समितिका सदस्य सचिव विश्वराज ढकालले जानकारी दिएका छन ।
अम्बेमाता प्रावि बुद्धपुर, कालिका प्रावि सोनवर्षा, अमृता प्रावि सोनपुरका लागि पनि एक÷एक शिक्षक दरबन्दीका लागि रु एक लाख ५० हजारका दरले बजेट छुट्याइएको छ । उढरापुर, सोनपुर र रनियापुरमा रहेका तीन मदरसालाई पनि रु एक लाख वार्षिक अनुदान दिने गरी निर्णय गरिएको छ ।
खजुरा गाउँपालिका अध्यक्ष किस्मतकुमार कक्षपतिका अनुसार गत वर्ष कम्प्युटर प्रदान गरिएका समुदायिक विद्यालयका कम्प्युटर शिक्षकलाई दशैँ र तिहारको बीचमा १५ दिने तालीम दिइने, विद्यालय कर्मचारीका मागलाई सम्बोधन गर्दै वार्षिकरूपमा खाँदै आएको सेवामा रकम थप गरिनेछ ।
कुल १४ मावि, पाँच निमावि, १२ प्रावि १७ मदरसा र ६६ बाल विकास रहेको खजुरा क्षेत्रभित्र शिक्षक दरबन्दी व्यवस्थापन, कम्प्युटर तालीम, विद्यालय कर्मचारी, बाल विकास कर्मचारीलाई थप र कक्षकोठा सवलीकरण गरी करीब रु ७९ लाख ४३ हजार छुट्याइएको जनाइएको छ ।
गाउँपालिले मदरसालाई थप व्यवस्थित गर्न निशार अली दर्जीको संयोजकत्वमा कार्यदलसमेत गठन गरेको छ । रासस
