काठमाडौँ,३ मङ्सिर । भौतिक पूर्वाधार निर्माणमा भएको ढिलाइले पूर्वघोषित मिति यही मङ्सिर २१ गते आठौँ राष्ट्रिय खेलकूद प्रतियोगिता नेपालगञ्जमा नहुने भएपछि फागुनको पहिलो सातामा गर्न खेलकूद मन्त्रालयसँग माग गर्ने निर्णय गरिएको छ ।
बाँके र दाङबाट सङ्घीय, प्रदेश संसद् र राष्ट्रियसभामा प्रतिनिधित्व गर्ने सांसद र स्थानीय जनप्रतिनिधहरुको उपस्थितिमा मध्यपश्चिम क्षेत्रीय खेलकूद विकास समिति प्रदेश ५ को आज यहाँ बसेको बैठकले उक्त निर्णय गरेको हो । बैठकमा सहभागी सांसद नन्दलाल रोकाय, कोमल वली, बाबुराम गौतम, सुरेन्द्र हमाल, कृष्णा केसी, ‘नमूना’ नेपालगञ्ज उपमहानगरपालिकाका उपप्रमुख उमाथापा मगर र कोहलपुर नगरपालिकाका प्रमुख लुटबहादुर रावतले प्रतियोगिता सञ्चालनका लागि सबैखाले आवश्यक सहयोग गर्ने लिखित प्रतिबद्धतासमेत व्यक्त गरेका छन ।
क्षेत्रीय खेलकूद विकास समिति प्रदेश ५ का अध्यक्ष भीम ओलीले खेलकूद पूर्वाधार निर्माणका लागि रोकिएको बजेट प्राविधिक टोलीको प्रतिवेदनका आधारमा निकासा हुन थालेकाले माग गरिएको मिति फागुनको पहिलो सातामा प्रतियोगिता सञ्चालन हुने जानकारी गराए । अध्यक्ष ओलीले केही कठिनाइका बाबजुद पनि प्रतियोगिता आयोजना गर्न कुनै कसर बाँकी नराख्ने अठोटसमेत व्यक्त गरे। आठौँ राष्ट्रिय खेलकूद प्रतियोगिताका लागि अध्यक्ष ओलीले यस क्षेत्रका खेलाडीको बन्द प्रशिक्षण पनि छिट्टै शुरु गरिने जानकारी दिए ।
नेपालगञ्जमा हुने आठौँ राष्ट्रिय खेलकूद प्रतियोगितालाई दृष्टिगत गरी भौतिक पूर्वाधार निर्माणको कार्यलाई अहिले तीव्रता दिइएको छ । राष्ट्रिय खेलकूद प्रतियोगिताका लागि नेपालगञ्ज रङ्गशालामा खेलकूदका भौतिक पूर्वाधार निर्माणको काम अहिले धमाधम भइरहेको छ । पूर्वाधार निर्माणअन्तर्गत नेपालगञ्ज रङ्गशालास्थित कबर्ड हलको स्तरोन्नतिको काम सम्पन्न भइसकेको छ । रङ्गशाला क्षेत्रको बाहिर रहेको कबर्ड हलको छाना आधुनिक बनाइएको छ भने भुइँमा फ्लोरिङ गर्ने काम पनि सकिएको अध्यक्ष ओलीले बताए ।
त्यसैगरी, रङ्गशाला क्षेत्रमा झण्डै १८ करोडको लागतमा पौडी पोखरी र २४ करोडको लागतमा प्यारापिटसहितको अत्याधुनिक रङ्गशाला निर्माण भइरहेको छ । पूर्वाधार निर्माणअन्तर्गत रङ्गशालामा रु सात करोडको लागतमा ट्र्याक एण्ड फिल निर्माणको काम पनि धमाधम भइरहेको छ । रङ्गशाला क्षेत्रभित्रै भारोत्तोलन एकेडमी, सुटिङ रेञ्ज निर्माणको काम अन्तिम चरणमा पुगेको छ । सुटिङका लागि आवश्यक एअर पेस्तोल र एअरगन खरीद प्रक्रिया पूरा भइसकेको छ ।
आठौँ राष्ट्रिय खेलकूद प्रतियोगिताका केही खेलहरु बाँकेको कोहलपुर, बर्दिया र दाङमा पनि हुनेछ । त्यसका लागि बाँकेको कोहलपुरमा रहेको क्रिकेट मैदान वरिपरि पर्खाल निर्माण, दाङको बेलझुण्डीमा रु २५ करोडको लागतमा रङ्गशाला, बर्दियाको गुलरिया र ठाकुरद्वारामा खेलमैदान तथा कबर्डहल मर्मत र निर्माणको काम भइरहेको छ । आठौँ राष्ट्रिय खेलकूद प्रतियोगिताका लागि बर्दिया राष्ट्रिय निकुञ्जको पहिचान झल्किने गरी हात्तीको छावालाई ‘मस्कट’का रुपमा पारित गरिएको छ ।रासस
