हेटौँडा, ७ चैत । प्रदेश ३ का मुख्यमन्त्री डोरमणि पौडेलले हेटौँडामा रहेको गौरीटार रङ्गशालालाई अन्तर्राष्ट्रियस्तरको रङ्गशाला बनाउने बताउनुभएको छ । आजबाट हेटौँडामा शुरु भएको दोस्रो भूगर्भ सिमेन्ट शहीद स्मृति मकवानपुर गोल्डकपमा मुख्यमन्त्री पौडेलले हेटौँडाकै हुप्र चौरलाई पनि प्याराफिटसहितको फुटबल मैदानका रुपमा विकास गरिने बताउनुभयो । प्रदेशको फुटबलको स्तर वृद्धि गर्न सरकार लागिपर्ने उहाँको धारणा थियो ।
मुख्यमन्त्रीले विगतमा मकवानपुर फुटबलले राष्ट्रिय प्रतियोगिताहरुमा राम्रो प्रस्तुति देखाउने गरेकामा अचेल त्यस्तो नदेखिएको बताउँदै मकवावपुर फुटबलले आफ्नो पुरानो साख फर्काउन लाग्नुपर्ने धारणा राख्नुभयो । प्रदेश ३ का प्रमुख प्रतिपक्ष दलका नेता इन्द्रबहादुर बाँनियाले मकवानपुर गोल्डकपले नेपाली फुटबलको विकासमा योगदान दिने बताउनुभयो ।
आजबाट हेटौँडामा शुरु भएको गोल्डकपमा विभिन्न राष्ट्रियस्तरका १० टोलीको सहभागिता रहनेछ । जसअन्तर्गत आज भएको उद्घाटन खेलमा मच्छिन्द्र क्लबलाई २–१ गोलअन्तरले पराजित गर्दै मकवानपुर ११ ले भूगर्भ सिमेन्ट दोस्रो शहीद स्मृति मकवानपुर गोल्डकपमा विजयी शुरुआत गरेको छ ।
काठमाडौँको मच्छिन्द्र क्लबले शुरुआती अग्रता हासिल गरेको थियो । मच्छिन्द्रका तर्फबाट खेलको १६औँ मिनेटमा डम्बिया महोम्बदले गोल गर्दै टोलीलाई १–० को अग्रता दिलाएका थिए । पहिलो हाफको ३० औँ मिनेटसम्म अग्रता हासिल गरेको मच्छिन्द्रले मकवानपुरका काजिमको गोलसँगै अग्रता छोड्नु परेको थियो । काजिमले मकवानपुरलाई भने १–१ को बराबरीमा ल्याए ।
पहिलो हाफ १–१ बराबरीमा रोकिएको मकवानपुरले दोस्रो हाफमा फेरि अग्रता लियो । खेलको ६३औँ मिनेटमा पुनः मकवानपुरकै काजिमले दोस्रो गोल गरेपछि समग्रमा मकवानपुर २–१ गोलअन्तरले विजयी भएको हो । खेलको ‘म्यान अफ दी म्याच’ पनि दुई गोल गरेर खेल कौशल देखाएका काजिम घोषित भए । रासस
