काठमाडौं, १४ चैत । प्रधानमन्त्री एवं नेपाल कम्यूष्टि पार्टी (नेकपा) का अध्यक्ष केपी शर्मा ओलीले पार्टीभित्र गुट/उपगुट नचल्ने बताएका छन् ।
प्रधानमन्त्री ओलीले नेकपाको ३ नं प्रदेश कमिटीका पदाधिकारीहरुको सपथग्रहण तथा प्रथम बैठकलाई आज सम्बोधन गदै यस्तो बताएका हुन् ।
प्रधानमन्त्री ओलीले नेतृत्वले कसैलाई पनि काखा र पाखा नगर्ने स्पष्ट पार्नु भएको छ । “दुई पार्टीको एकताको अर्थ यो हो कि हामीमा गुट–उपगुट छैनन्” प्रधानमन्त्री ओलीले भने“हामी बैचारिक रुपमा स्पष्ट र सांगठनिक रुपमा बलियो पार्टी हौं । त्यसैले यहाँ अन्तकुन्तरबाट गुट सञ्चालन गरेर पार्टीलाई कमजोर र कार्यकर्तालाई अन्यौल पार्ने काम कसैले पनि गर्नुहुदैन । पार्टी कमजोर हुँदा नेताहरु कोही जेलमा थियौं ,कोही भूमिगत अवस्थामा थियौं तर सवल हुँदा हामी सरकारमा छौं । त्यसकारण पार्टीलाई एकतावद्ध बनाएर लैजानु पर्दछ ।”
प्रधानमन्त्री ओलीले नेकपाको एकता भवितव्य नभएको बताए । लामो बहस, छलफल र देशप्रतिको जिम्मेवारीका कारण पार्टी एकता सम्भव भएको प्रधानमन्त्री ओलीको भनाइ छ । “नेकपा भवितव्य भएर ठुलो पार्टी भएको होइन, पानी बर्षे जसरी बहुमत बर्षेको होइन” प्रधानमन्त्री ओलीले भने,“यसमा जनताको विश्वास,पार्टीको दृष्टिकोण र देश बनाउने प्रतिवद्धतालाई जनताले अनुमोदन गरेका हुन् ।”
वर्तमान सरकारलाई कम्यूनिष्ट नेतृत्वकोमात्र नभई कम्यूनिष्ट पार्टीको सरकार भएको उनको भनाइ छ । “विगतमा हामीले कम्यूनिष्ट नेतृत्वको सरकार मात्र बनाउन सक्यौं तर अहिले नेतत्व मात्र होइन सरकार नै कम्यूनिष्ट पार्टीको छ । त्यस कारण हामीले चुनावमा गरेको प्रतिवद्धता अनुसार जनताको पक्षमा काम गर्छौं ।”–उनले थपे ।
प्रधानमन्त्री ओलीले पार्टी एकताका कारण कतिपय क्षमतावान कार्यकर्ताहरुले जिम्मेवारी नपाए पनि धैर्य गर्न सुझाएका छन् । “पार्टी एकताका कारण कतिपय सक्षम नेता कार्यकर्ताहरुलाई पनि जिम्मेवारी दिन सकिएको छैन” प्रधानमन्त्री ओलीले भने“पानीले आफ्नो आकार आफैं ग्रहण गरेजस्तै सक्षम कार्यकर्ताहरुले पार्टीमा आफैं स्थान आफैं बनाउनुहुनेछ । निराश नहुनुहोस । कामलाई निरन्तरता दिनुहोस ।”
प्रधानमन्त्री ओलीले पार्टी एकताको काममा केही ढिलाइ भएपनि अब प्रतिक्षाको घडी सकिएको बताए । “पार्टी एकताका लागि केही बिलम्ब भएकै हो ” प्रधानमन्त्री ओलीले भने–‘तर अब प्रतिक्षाको घडी सकिएको छ । चाँडै तल्ला तहका कमिटीको एकताले पनि पूर्णता पाउनेछ ।”
तस्विर : मुकुन्द कालिकोटे/ReportersNepal.com
