खस्यौली, ११ वैशाख । प्रदेश नं ५ को प्रदेशसभामा एक वर्षको अवधिमा चार पटक प्रदेशसभा स्थगन भएको छ । खास गरेर विपक्षी दल नेपाली काङ्ग्रेसको अवरोधका कारण विभिन्न विषयमा प्रदेशसभा स्थगन भएको प्रदेश नं ५ को सचिवालयले जनाएको छ । विसं २०७५ को असार ४, साउन १३, माघ १८ र माघ २२ गते विपक्षी नेपाली काङ्ग्रेसको अवरोधका कारण प्रदेशसभा स्थगन भएको थियो ।
बजेटका विषयमा मुख्यमन्त्री शङ्कर पोखरेलको धारणा, स्थायी राजधानीका विषयमा मुख्यमन्त्रीको जवाफ, निर्मला हत्याकाण्ड र डा गोविन्द केसीको सत्याग्रहको विषयलाई लिएर प्रदेशसभा अवरुद्ध भएको थियो । “संसदमा विपक्षी दलको सहभागिता विना संसद् सञ्चालन गर्न सहज वातावरण हुँदैन, विपक्षीको अवरोध भएपछि प्रदेशसभा स्थगन हुन्छ”, प्रदेश नं ५ को प्रदेशसभाका सचिव दुर्लभकुमार पुनले भन्नुभयो ।
नेपाली काङ्ग्रेसका प्रदेशसभा सदस्य डिल्ली चौधरीले प्रदेशसभा अवरुद्ध भएपछि धेरै विषय सम्वादबाट समाधान भएको उल्लेख गर्दै अझै पनि प्रदेशको अधिकार कटौतीको विषयमा संयुक्त छलफल गरिरहेको जानकारी दिनुभयो ।
प्रदेश नं ५ को प्रदेशसभामा अहिलेसम्म ७० वटा बैठक बसेको छ जसले ३३ वटा विधेयक पारित गरेको छ । ती बैठकमध्ये २२ पहिलो अधिवेशनमा, दोस्रो अधिवेशनमा २८ र तेस्रो अधिवेशनमा ३० बैठक प्रदेशसभाको भएको छ । विसं २०७४ माघ २१ गते प्रदेशसभाको पहिलो बैठक भएको थियो ।
प्रदेशसभामा पाँच दलका ८७ जनामध्ये एक जना प्रदेशसभा सदस्यको मृत्युपछि ८६ सदस्य छन् । यसमध्ये नेपाल कम्युनिष्ट पार्टीका ६०, नेपाली काङ्ग्रेसका १९, सङ्घीय समाजवादी फोरम नेपालका पाँच र राष्ट्रिय जनमोर्चा नेपाल र राष्ट्रिय जनशक्ति पार्टीका एक एक प्रदेशसभा सदस्य छन् ।रासस
