काठमाडौं, ७ माघ । राष्ट्रिय स्वतन्त्र पार्टी (रास्वपा) कि सांसद सोविता गौतमले आफूलाई मतदाताले निर्वाचित गराएर नेता भनेको एउटा ठूलो कद भएको व्यक्ति हुनुपर्छ भन्ने भाष्यलाई अन्त्य गराएको बताएकी छन् । बिहीबार प्रतिनिधिसभाको बैठकलाई सम्बोधन गर्दै गौतमले आफूभन्दा कान्छो व्यक्तिको यसभन्दा अघि संसदमा प्रतिनिधित्व नभएको दाबी गर्दै यस्तो बताएकी हुन् ।
‘मेरो उपस्थिति यो सदनकै निम्ति पनि ऐतिहासिक क्षण हुनसक्छ । सम्भवत म भन्दा कान्छो व्यक्तिले यो सदनमा सम्बोधन गर्ने मौका अवश्य पनि पाएको थिएन होला,’ उनले भनिन् । लोकतन्त्र शासन पद्धति नभएर जनताको जीवनशैली भएको र जनताको भावनाको प्रतिनिधित्व हुनुपर्ने उनले बताइन् ।
‘लोकतन्त्र फगत शासन पद्धति मात्रै होइन, जनतको जीवनशैली पनि हो । लोकतन्त्रको अब्बल परीक्षा पिछिडिएको वर्गले मुलधारको प्रतिस्पर्धामा भाग लिन पाउँदा मात्रै हाम्रो लोकतन्त्र उन्नत हुनसक्छ,’ उनले भनिन् । साथै, उपसभामुखको उम्मेदवार रहेकी इन्दिरा राणाको प्रस्तावक रहेकी गौतमले इन्दिराको पक्षमा मतदानको लागि पनि आह्वान गरिन् । इन्दिरा उपसभामुखको कुर्चीमा बस्नु पद र संसद दुवैको सम्मान हुने उनले बताइन् । उनले उपसभामुखको अर्की उम्मेदवार मुक्ताकुमारी यादवलाई शुभकामना दिइन् ।
