काठमाडौं, २२ माघ । राष्ट्रिय स्वतन्त्र पार्टी (रास्वपा) को केन्द्रीय कमिटी र संसदीय दलको बैठक संयुक्त बैठक सुरु भएको छ । बैठक पार्टी केन्द्रीय कार्यालय बसुन्धारामा सुरु भएको हो । रास्वपाको आजको बैठकलाई निर्णायक बैठकको रुपमा हेरिएको छ । सभापति रबि लामिछानेले पार्टी बैठक लगत्तै विशेष पत्रकार सम्मेलनको आयोजना गरेका छन् । उनको आजको पत्रकार सम्मेलन निर्णायक हुने आँकलन गरिएको छ ।
नागरिकता विवादमा सर्वोच्च अदालतले सांसद पद खारेज गरेपछि लामिछाने उपप्रधान तथा गृहमन्त्रीबाट पदमुक्त भएका थिए । उनले जिल्ला प्रशासन कार्यालय काठमाडौंमा गएर नागरिकता प्राप्तिको प्रक्रियासमेत पुरा गरिसकेका छन् । आफूलाई गैरसांसदका रुपमा पुनः सोही मन्त्रालयको जिम्मेवारी दिन उनले सत्ता गठबन्धनका शीर्ष नेताहरुसँग आग्रह गर्दै आएका छन् । उनको आग्रहमा एमाले अध्यक्ष केपी शर्मा ओली सकारात्मक भएपनि प्रधानमन्त्री पुष्पकमल दाहाल ‘प्रचण्ड’ गृहमन्त्रालय रास्वपालाई दिन नसकिने अडानमा छन् ।
रास्वपामा अहिले सरकारबाट बाहिरिनु पर्ने बलियो भएको बुभिएको छ । प्रधानमन्त्री प्रचण्डले गैरसांसदको रुपमा रबिलाई गृहमन्त्रालय नदिनुलाई रास्वपाले अपमानको रुपमा हेरेको छ ।
सभापति लामिछानेले आजै प्रधानमन्त्री दाहालसँग भेटवार्ता गरेका थिए । सो भेटवार्तामा दाहालले गृहको साटो भौतिक पूर्वाधार तथा यातायात मन्त्रालय लिन प्रस्ताव गरेका छन् । प्रधानमन्त्री दाहालको प्रस्तावबारे पार्टीमा छलफल हुने भनिएको छ । तर, लामिछानेले सामाजिक सञ्जालमार्फत गरेको संकेतले रास्वपा सरकारबाट बाहिरिने सम्भावना बढेको छ। उनले आफूले सिधा कुरा नगरेको धेरै भएको भन्दै आज विशेष पत्रकार सम्मेलन गर्ने पनि जनाएका छन् । पार्टीको बैठकलगत्तै उनले पत्रकार सम्मेलन गर्ने जनाएका छन् ।
