काठमाडौं, १० चैत्र । नेकपा (एमाले) का उपाध्यक्ष युवराज ज्ञवालीले अहिले सञ्चालन भइरहेको मिसन ग्रासरुट अभियानले एमालेको उपचार गर्ने बताएका छन्।
नेकपा (एमाले) तनहुँ क्षेत्र नं १ क्षेत्रीय समितिले शनिबार भानु नगरपालिका–१ भन्सारमा आयोजना गरेको कार्यक्रममा उपाध्यक्ष ज्ञवालीले पार्टीमा रहेका रोग हटाउन मिसन ग्रासरुटले सहयोग पुग्ने आशा राखे।
‘मिसन ग्रासरुट अभियानमा प्रत्येक टोलमा पुग्नुपर्छ, यो अभियानले एमालेको उपचार गर्छ, रोगहरू हटाउँछ र पार्टी पहिलेभन्दा स्वस्थ बन्छ’, ज्ञवालीले भने, ‘आफ्ना असन्तुष्टिलाई थाँती राख्नुपर्छ। यो महाअभियान हो, सबै जना लाग्नुपर्छ।’
तनहुँ १ मा वैशाख १० गते हुने उपनिर्वाचनका सन्दर्भमा ज्ञवालीले उम्मेदवार हुन कार्यकर्ताले मन पराउने मान्छे आवश्यक रहेको बताए। ‘जितेर मात्रै हुँदैन, टिक्ने पनि हुनुपर्यो, विगतमा धेरैले जितेर गए पनि टिक्न नसक्ने पनि छन्’, ज्ञवालीले भने, ‘सधैँभरि पार्टीको पक्षमा लाग्न सक्ने उम्मेदवार चाहिन्छ। सबै पार्टी कमिटी एकताबद्ध भएर चुनावमा लाग्नुपर्छ।’
ज्ञवालीले चुनाव एउटा लडाइँ भएकाले त्यो लडाइँ एमालेले जित्नुपर्ने जिकिर गरे। कम्युनिष्टहरू सिद्धान्त, देश र जनताप्रति समर्पित हुनुपर्ने ज्ञवालीको जोड थियो। सुखी नेपाली समृद्ध नेपाल एमालेको मुख्य ध्येय भएको चर्चा गर्दै ज्ञवालीले देश समृद्ध मात्र भएर नभई जनता सुखी पनि हुनुपर्ने बताए।
