काठमाडौं, ७ जेठ । नेपाल प्रहरीले नक्कली भुटानी शरणार्थी प्रकरणको मुख्य योजनाकार ४ जना रहेको निश्कर्ष निकालेको छ।
प्रहरीले निलम्बित एमाले सचिव तथा पूर्वउपप्रधानमन्त्री टोपबहादुर रायमाझी, एमालेकै नेता तथा पूर्वगृहमन्त्री ‘बादल’का सल्लाहकार डा. इन्द्रजित राई, मोरङका केशव दुलाल र ललितपुरका सानु भण्डारी मुख्य योजनाकार रहेको निश्कर्ष निकालेको छ।
दुलालकै आग्रहमा भण्डारीले नेपाल सरकारले भुटानी शरणार्थीहरुलाई अमेरिका लगिरेहको र ती शरणार्थीहरुमा नेपालीहरुलाई पनि घुसाएर अमेरिका लग्ने योजना सुनाएको प्रहरीले अनुसन्धानबाट निश्कर्ष निकालेको छ।
सरकारले सक्कली भुटानी शरणार्थीलाई अमेरिका लगिरहेको र सो लहरमा केही नेपालीहरूलाई भुटानी शरणार्थीको परिचयपत्र दिलाएर उनीहरूसँगै अमेरिका उडाउने र सो प्रकियामा अमेरिका जान चाहाने व्यक्तिहरूसँग लाखौँ रूपैयाँ उठाउने योजना भण्डारीले आफ्नै घरमा डेरागरी बसिरहेका तत्कालिन उपप्रधानमन्त्री रायमाझीलाई सुनाएका थिए।
सो योजनाबाट प्रेरित भएर रायमाझीले दुलाल र भण्डारीलाई तत्कालिन गृहमन्त्री रामबहादुर थापाका सल्लाहकार डा. इन्द्रजितलाई भेटाएर उक्त प्रकिया अगाडि बढाउन आग्रह गरेको उनीहरुले सरकारी वकिल कार्यालयमा दिएको बयानका आधारमा प्रहरीले निश्कर्ष निकालेको छ।
तत्कालिन गृहमन्त्री थापा बाहिरिएपछि उनका सल्लाहकार डा. इन्द्रजितपनि बाहिरिँदा सो गिरोहले आफ्नो योजना साकार पार्न अर्का गृहमन्त्री बालकृष्ण खाँणलाई प्रयोग गर्ने जुक्ति अपनाए।
त्यसका लागि उनीहरूले मोरङका सागर राईलाई प्रयोगमा ल्याए। राईमार्फत उनीहरूले तत्कालिन गृहमन्त्री खाँण र तत्कालीन गृह सचिव टेकनारायण पाण्डेसँग पकड बनाएर आफ्नो काम अगाडि बढाउन खोजेको प्रहरीले निश्कर्ष निकालेको छ।
सो प्रकरणमा प्रहरीले हालसम्म १६ जनालाई हिरासतमा राखेर अनुसन्धान गरिरहेको छ।
