काठमाडौं, ३ साउन । नेपाली कांग्रेसको केन्द्रीय कार्यालयमा गत असार २१ र २२ गते भएको जिल्ला सभापतिहरको वैधानिकतामाथि प्रश्न उठेको छ । आज (बुधबार) जारी कांग्रेसको केन्द्रीय कार्यसमितिको बैठकमा नैनसिंह महरले केन्द्रीय सदस्यलाई बाहिर राखेर गरिएको बैठकको वैधानिकतामाथि प्रश्न उठाएका हुन् ।
‘लोकतन्त्रमा रिजल्टमात्रै हेरिँदैन, प्रोसेस पनि हेरिन्छ । मैले सुनेको कृष्णप्रसाद भट्टराई, गिरिजाप्रसाद कोइराला, सुशिल कोइरालाहरु पनि पार्टी सभापति हुँदा खेरी केन्द्रीय समितिको अनुपस्थिति राखेर जिल्ला सभापतिहरुको भेला राखेको मैले सुनेको छैन,’– उनले भने ।
कांग्रेस जिल्ला सभापतिहरुको बैठकमा सभाति शेरबहादुर देउवासमेत उपस्थित थिएनन् । महामन्त्रीद्वय गगनकुमार थापा र विश्वप्रकाश शर्माले बैठकलाई सम्बोधन गरेका थिए । दुई दिन भएको जिल्ला सभातिहरुको बैठकमा १४ वुँदे आन्तरिक प्रतिवद्धता पारित गरिएको थियो ।
पार्टी महामन्त्रीद्वय थापा र शर्माले बैठकबाट आएका सुझावहरुलाई पार्टी तहमा छलफल गरी आवश्यकता अनुसार आगामी केन्द्रीय कार्यसमितिको बैठकमा प्रस्तुत गर्ने प्रतिवद्धता व्यक्त गरेका थिए । केन्द्रीय सदस्यहरुले उक्त बैठकको वैधानिकतामाथि नै प्रश्न गरेका छन् ।
