काठमाडौं,११ साउन । राष्ट्रिय युवा परिषद्ले २४औं अन्तर्राष्ट्रिय युवा दिवस मनाउन मूल समारोह समिति गठन गरेको छ ।
परिषद अध्यक्ष सुरेन्द्र बस्नेतको अध्यक्षतामा युवा तथा खेलकुद मन्त्रालयमा आज बसेको बैठकले आगामी साउन २८ गते दिवस मनाउन युवा तथा खेलकुदमन्त्री डिगबहादुर लिम्बुको अध्यक्षतामा मूल समारोह समिति गठन गरिएको छ ।
साउन २८ गते बिहान काठमाडौंको भृकुटीमण्डपबाट प्रभातफेरी कार्यक्रमको आयोजना हुने छ । प्रभातफेरीमा नेपाली सेना, नेपाल प्रहरी, सशस्त्र प्रहरी बलसहित राष्ट्रिय खेलकुद परिषद्को समेत सहभागिता हुने परिषद्ले जनाएको छ ।
संयुक्त राष्ट्र संघको आह्वानमा हरेक वर्ष अगस्ट १२ को दिन विश्वव्यापी रूपमा युवा दिवस मनाउने गरिन्छ ।
तस्बिर: मुकुन्द कालिकोटे-रिर्पोटस नेपाल
