काठमाडौं,१२ साउन । नेकपा एमाले कोशी प्रदेश संसदीय दलका नेता हिक्मतकुमार कार्कीले कांग्रेसँग मिलेर नयाँ सरकार बनाउन एमाले तयार रहेको बताएका छन् ।
सर्वोच्चको परमादेशपछि कामचलाउ मुख्यमन्त्रीको पदबहाली गर्न विराटनगर पुगेका कार्कीले विमानस्थलमा आयोजित पत्रकार सम्मेलनमा बोल्दै प्रदेशको स्थायित्व र समृद्धिको लागि एमाले बाधक नहुने प्रष्ट पारे ।
‘कांग्रेससँग मिलेर अगाडि बढ्ने कुरामा हामी खुल्ला छौं । त्यसमा मेरो के मान्यता छ भने मुलुकका दुई ठूला दल एमाले र कांग्रेसकाबीचमा प्रजातनत्तलाई संस्थागत गर्ने कुरामा,संविधान र कानूनको संस्थागत गर्ने कुरामा हाम्रा कुरा मिल्छ भने अगाडि बढ्न तयार छौं’। उनले भने ।
कांग्रेसलाई मुख्यमन्त्री दिन तयार हुनुहुन्छ भन्ने सञ्चारकर्मीको प्रश्नमा कार्कीले भने, ‘मुख्यमन्त्री दिन हामी तयार छौं । बहुमत नभएपछि मुख्यमन्त्री दिन पनि तयार हुनुपर्छ । तर कार्यकाल बाँड्ने कुरामा म सहमत छैन ।’
