काठमाडौं,२१ साउन । अन्ततः निक्कै लामो रस्साकस्सी पछि बागमती प्रदेश सरकारका बिना विभागीयमन्त्री रामकृष्ण चित्रकारले जिम्मेवारी पाएका छन् ।
गत जेठ ७ गते भएको मन्त्रिपरिषद् विस्तारमा विना विभागीय मन्त्री नियुक्त भएका चित्रकारले मन्त्रालय फुटाएर नयाँ मन्त्रालय बनाएपछि आज जिम्मेवारी पाएको एक नेताले जानकारी दिए ।
हाल प्रदेश सरकारमा कांग्रेसको भागमा परेको पयर्टन उद्योग तथा सहकारी मन्त्रालयलाई टुक्रायर उद्योग तथा सामान्य प्रशासन मन्त्रालय बनाई चित्रकारलाई उक्त मन्त्रालयको जिम्मेवारी दिइएको हो ।
एक मन्त्रालय फुटाएसँगै प्रदेशमा मन्त्रालयको संख्या १२ पुगेको छ । अघिल्लो सरकारले मन्त्रालय बढाएको भन्दै आलोचना भएपछि यसपटक मन्त्रालय घटाएर ११ वटामा झारेका मुख्यमन्त्री शालिकराम जम्कट्टेलले अन्तिममा आएर आफ्नै निर्णयबाट ब्याक हुँदै मन्त्रालय फुटाएका छन् ।
नेपाली कांग्रेसका प्रदेश संसदीय दलका उपनेतासमेत रहेका मन्त्री चित्रकारले मन्त्री नियुक्त भएदेखि नै जिम्मेवारी पाउन सकेका थिएनन् । कांग्रेसले भौतिक पूर्वाधार मन्त्रालय विभाजन गरी उनलाई जिम्मेवारी दिनुपर्ने माग गर्दै आए पनि माओवादी केन्द्रले आफ्नो भागमा परेको सो मन्त्रालय विभाजन गर्न अस्वीकार गर्दै आएको थियो ।
