काठमाडौं, २२ साउन । आर्थिक वर्ष २०७९/८० का लागि नेपाल अक्सिजन ग्यास उत्पादन संघको १३औँ वार्षिक साधारणसभा सफलतापूर्वक सम्पन्न भएको छ । साधारण सभाले सर्वसम्मतिले गौरव शारदालाई कम्पनीको अध्यक्षमा पुनः निर्वाचित गरेको छ ।
साथै, उपाध्यक्षमा वीरेन्द्रकुमार संघाई, सचिवमा नारायण दत्त तिमिल्सिना, कोषाध्यक्षमा प्रह्लाद तिमिल्सिना र शंकरलाल अग्रवाल, अभिक ज्योति, दिनेश ढकाल र सचिवमा निर्वाचित भएका छन् । सदस्यमा शरद खनाल निर्वाचित भएका छन् ।
सरकारले कोभिड संकटका बेला लिइएको अक्सिजन सिलिण्डर अझै फिर्ता नगरेकोले उद्योगलाई ठूलो आर्थिक नोक्सानी पुर्याएको र यसतर्फ सरकारको ध्यानाकर्षण गराउने बोर्ड सदस्यहरुले प्रतिबद्धता जनाएका छन् । संघले अक्सिजन सिलिण्डरको गुणस्तर मापदण्ड र नियमनका लागि आवश्यक कानुन बनाउन सम्बन्धित निकायलाई दवाब दिने निर्णय गरेको छ ।
‘कलर कोडिङ, लेबलिङ, अधिकतम फाइलिङ प्रेशर, ग्यास गठन र आवधिक निरीक्षण विवरणहरू लागू गर्ने नियमहरू कामदारहरूको सुरक्षा सुनिश्चित गर्न सम्बन्धित अधिकारीहरूले कडाईका साथ लागू गर्नुपर्छ,’– अध्यक्ष शारदाले भने ।
संघले लिक्विड अक्सिजनको उल्लेख्य आयातमा सरकारको ध्यानाकर्षण गराउने निर्णय पनि गरेको छ । नेपालमा सञ्चालित अक्सिजन ग्यास उद्योगको उत्पादन मागभन्दा बढी भएकाले तरल अक्सिजन आयात गर्नुपर्ने अवस्था नरहेको. उनले बताए । तरल अक्सिजनको आयातका कारण देशभर सञ्चालित २८ अक्सिजन उद्योगको भविष्य संकटमा परेको उनको भनाई छ । यसरी नेपाल अक्सिजन ग्यासका लागि भारतमा भर पर्न बाध्य भएको अध्यक्ष शारदाले बताए ।
