काठमाडौं, २५ श्रावण । केन्द्रीय अनुसन्धान ब्युरो (सिआइबी)ले ललिता निवास जग्गा प्रकरणअन्तर्गत पूर्वप्रधानमन्त्रीद्धय माधवकुमार नेपाल र बाबुराम भट्टराईको बयान लिने तयारी गरेको छ।
सर्वोच्च अदालतले ललिता निवास प्रकरणमा तत्कालिन मन्त्रिपरिषद्का सदस्यहरूमाथि अनुसन्धान गर्न आदेश दिएसँगै सिआइबीले पनि तत्कालिन प्रधानमन्त्रीद्धय नेपाल र भट्टराईलगायत सो प्रकरणमा मुछिएका तत्कालिन मन्त्रीहरूमाथि पनि बयान लिने आन्तरिक तयारी गरेको हो।
उनीहरूको बयान लिनका लागि प्रहरी प्रमुख बसन्तबहादुर कुँवरले महान्यायधिवक्ता दिनमणि पोखरेललगायतका सम्बन्धित व्यक्तिहरूसँग भेटेर छलफल गरिसकेका छन्।
पूर्वप्रधानमन्त्री नेपाल हाल विदेश भ्रमणमा रहेको हुँदा उनी फर्किएपछि मात्रै दुईटै प्रधानमन्त्रीको बयान सँगसँगै लिने सिआइबीले आन्तरिक तयारी गरेको स्रोतले बताएको छ।
