काठमाडौं,३० साउन । सर्वोच्च अदालतमा आज कुनैपनि मुद्दाउपर सुनुवाइ नहुने भएको छ ।
सर्वोच्च अदालतका पूर्व न्यायाधीश उदयराज उपाध्यायको निधन भएको कारण आज कुनैपनि मुद्दामाथि सुनुवाइ नगर्ने निर्णय भएको सर्वोच्च प्रशासनले जनाएको छ ।
सर्वोच्च अदालतका पूर्वन्यायाधीश उदयराज उपाध्यायको गएराति भएको असामयिक निधनमा शोक व्यक्त गर्न यस अदालतमा आज मिति २०८०-०४-३० गते पेसी तोकिएका मुद्दाको सुनुवाइ नहुने ब्यहोरा सम्बन्धित सबैको जानकारीको लागि यो सूचना प्रकाशन गरिएको छ, सर्वोच्चको प्रशासन शाखाले जारी गरेको सूचनामा भनिएको छ ।
उपाध्यायले २०१७ बैशाख २३ मा इलाका न्यायाधीशको रूपमा इलाका अदालत पाल्पाबाट न्याय सेवा प्रवेश गरी २०२५ असार १ मा धनुषा जिल्ला अदालतको न्यायाधीश, २०२८ कात्तिक ८ गते वाग्मती अञ्चल अदालतको कायममुकायम अञ्चल न्यायाधीश भएका थिए ।
त्यस्तै, २०४० मंसिर १२ मा क्षेत्रीय अदालतको न्यायाधीश, २०४८ कात्तिक १८ मा तत्कालीन पुनरावेदन अदालतको मुख्य न्यायाधीश हुँदै मिति २०४९ माघ १ मा सर्वोच्च अदालतको न्यायाधीश पदमा नियुक्त भई २०५७ भदौ २३ बाट सर्वोच्च अदालतबाट अवकाश प्राप्त गरेका थिए ।
