काठमाडौं,७ भदौ । प्रतिनिधि सभाको बैठक जारी छ । संघीय संसद भवन नयाँ बानेश्वरमा जारी बैठकमा सांसदहरुले आ-आफ्नो धारण राखिरहेका छन् ।
बिहीबारको संसद बैठकको शून्य समयमा बोल्दै विभिन्न सांसदहरुले जनताको जनजीविकासँग सम्बन्धित विषयमा सरकारको ध्यानाकर्षण गराएका छन् ।
बैठकको शून्य समयमा बोल्दै कांग्रेस सांसद तेजुलाल चौधरीले टीकापुर घटनाको बारेमा सत्यतथ्य छानबिन गरेर जेलमा भएका राजबन्दीलाई रिहाइ गर्न माग गरे । उनले टीकापुर घटना राजनीतिक प्रकारको भएकाले गम्भीर रुपमा लिएर राजबनदीलाई तत्काल रिहाइ नगरे पुनः अर्को त्यस्तै घटना दोहोरिन सक्ने बताए ।
रास्वपाका उपसभापतिसमेत रहेका सांसद डोलप्रसाद अर्यालले सरकारले साउन ३१ गते राजपत्रमा सूचना प्रकाशित गरेर लागू गरेको श्रमीकको नयाँ पारिश्रमीक सबै क्षेत्रमा लागू गर्न माग गरे । नेकपा एमालेका सांसद दामोदर भण्डारीले सुदूरपश्चिममा आजबाट मनाईँदै गरेको गौरा पर्वको शुभकामना व्यक्त गरे । त्यस्तै उनले वर्षात्का कारण अवरुद्ध भिमदत्त राजमार्ग तत्काल सञ्चालनको वातावरण निर्माण गर्न माग गरे ।
सांसद दीपा शर्माले शिक्षा क्षेत्रसँग सम्बन्धित विभिन्न निकायले जारी राखेको आन्दोलप्रति सरकारको ध्यानाकर्षण गरिन् । त्यस्त अर्का सांसद दूलर्भ थापा क्षेत्रीले भक्तपुरमा भदौ ३ गते भएको बालगृहको घटनाप्रति तत्काल छानबिन गरि मृतक बालकका परिवारलाई उचित क्षतिपूर्ती उपलब्ध गराउन माग गरे ।
कांग्रेसका अर्का सांसद देवप्रसाद तिमल्सिनाले रौटहटमा बन्द अवस्थामा रहेको श्रीराम चिनी मिल तत्काल सञ्चालनमा ल्याउन माग गरे । सांसद धनबहादुर बुढाले डोल्पामा रहेका दुईवटा नाका बन्द अवस्थामा रहेका कारण नागरिकको जनजीवन प्रभावित भएको जानकारी गराउँदै उक्त नाका सूचारु हुने वातावरण बनाउन सरकारसँग माग गरे ।
राप्रपा सांसद धवल समशेर जबराले विघटित कपास विकास समिति पुनः सञ्चालनमा ल्याउन माग गरे । उनले मन्त्रिपरिषद्बाट पारित नयाँ शिक्षा ऐनका कतिपय प्रावधानहरुले भविष्यमा नेपालको शिक्षा प्रणाली ध्वस्त हुने खतरा बढेकोतर्फ सरकारको ध्यानाकर्षण गराए ।
अर्का सांसद धु्रबबहादुर प्रधानले नवलपरासीमा देखिएको खानेपानीको समस्याबारे सरकारको ध्यानाकर्षण गराए । सांसद नारायणप्रसाद आर्चायले वर्षात्का कारण अवरुद्ध पाल्पाको आर्यवेनी रामपुर सडकखण्ड सहजरुपमा सञ्चालनको व्यवस्था गर्न माग गरे ।
त्यस्तै एमाले सांसद सूर्यबहादुर थापा क्षेत्रीले सरकार हरायो भन्दै सरकारको खोजी गर्न माग गरे । सांसद निशा डाँगीले भक्तपुरको बाल सुधार गृहमा भएको घटनाको बारेमा छानबिन गर्न माग गरिन् । सांसद प्रकाशमान सिंहले देशैभर परिरहेको अविरल वर्षात्का कारण बाढी पहिरोका घटनाप्रति सरकारको ध्यानाकर्षण गराए ।
अर्का सांसद प्रदीप पौडेलले त्रिवि अन्तर्गतको इन्जिनियरिङ अध्ययन संस्था आन्दोलनमा रहेको स्मरण गराउँदै इन्जिनियरिङको स्नातक तहको पढाइमा भएको शुल्क वृद्धि तत्काल फिर्ता लिन माग गरे । उनले त्रिवि सूधारका लागि शिक्षा मन्त्रालयसँग स्वतपत्र जारी गर्न माग गरे । अर्का सांसद प्रतिमा गौतमले सदन अवरुद्ध भएकोप्रति असन्तुष्ट व्यक्त गरिन ।
अर्का सांसद प्रभु हजाराले मधेशमा देखिएको चरम खानेपानीको समस्या समाधान गर्न सरकारसँग माग गरे । उनले वीरगञ्जमा अनावश्यकरुपमा प्रहरी र भन्सारको चेकजाँच लाई सहज बनाउन माग गरे । सांसद प्रेमबहादुर महर्जनले पछिल्लो समय देशैभरका सहमा बालबालिक हराउनेक्रम बढिरहेकोप्रति सरकारको ध्यानाकर्षण गराए ।
अर्का सांसद बद्रि पाण्डेले पशुहरुमा देखिएको लम्पि स्किनको रोग नियन्त्रणका लागि आवश्यक बजेट व्यवस्था गर्न माग गरे । सांसद बलराम अधिकारीले अव्यवस्थितरुपमा सडकमा छाडिएका गाईबस्तेलाई व्यवस्थित गर्न माग गरे । अर्का सांसद बासुदेव घिमिरेले स्थानीय तहले भोग्दै आएको फोहारमैला व्यवस्थापनको समस्यालाई प्रदेश र संघ सरकारले समन्वय गरेर सहज बनाउन माग गरे । अर्का सांसद बिन्दाबासिनी कंशाकारले हैटौडामा सडक फराकिलो बनाउने नाममा जनताका घर टहरा भत्काउने काम तत्काल रोक्न माग गरिन् ।
